'ACM Presents: Our Country' Country artist 20 aia tam an inlan
Pathianni zan khan CBS chuan darkar hniha rei television special 'ACM Presents: Our Country' chu pe chhuakin country music artist lar tak tak 20 chuang an inlan.
A nihna takah chuan Pathianni kha 2020 Academy of Country Music Awards sem hun tur a ni a, mahse coronavirus leng avangin September 16-a sem tura sawn a ni., CMA buatsaihtute chuan 'ACM Presents: Our Country' hi an buatsaih ta zawk a, Gayle King chuan he programme hi a host a, zaithiamte hi an chenna in aṭang ṭheuhin an rawn zai a ni.
Lawm hlawh zual ṭhenkhat
Lady Antebellum chuan “What I’m Leaving For” an sa a, anmahni in aṭang ṭheuha zaiin an fate'n an lo zawm ve bawk a, lawm an hlawh zual hle. An zai hma hian Covid-19 dona kawnga hma tawngtute chuan awlsam takin an chhungte an kalsan hmasa lo tih Hillary Scott chuan a sawi a, hei hian mi rilru a hneh hle.
Kane Brown leh John Legend ten “Last Time I Say Sorry” an perform dun bawk a, anni hi FaceTime kaltlangin an duet a ni.
Thomas Rhett chuan kar hmasa lawka Gospel singer Chris Tomlin, Keith Urban leh midang lar tak takte nena an sak ho a tih chhuah “Be a Light” a sa a, Eric Church chuan “Never Break Heart” a sa ve bawk.
Shania Twain chu a sakawr in aṭangin a rawn zai a “Honey I’m Home” leh “Man! I Feel Like a Woman”-te a sa ve thung. Carrie Underwood chuan “Drinking Alone” a sa a, a bula uaiin sen noa dah chunga a zai leh a hla chu a inhmeh hle.
Sawi hmaih theih lo chu Keith Urban bawk hi a ni awm e, “Wasted Time”a sa a ni. Miranda Lambert chuan a hla thar ber “Bluebird” sa ve bawkin, Oklahoma-a lockdown-a awm dun mek Blake Shelton leh Gwen Stefani-te chuan mawi takin “Nobody But You” an sa ve bawk a ni.
Kenny Rogers pualin Brad Paisley, Darius Rucker leh Luke Bryan
ACM Presents: Our Country-ah hian Brad Paisley, Darius Rucker leh Luke Bryan-te chuan Kenny Rogers zahna hlanin, Roger-a'n kum 1977-a a tih chhuah ''Lucille'' leh ''The Gambler'' bakah ''Coward of the County''-te an sa.
Brad Paisley leh Darius Rucker hian ''Lucille'' hmangin bul an ṭan a, “The Gambler” sak chhunzawm lehin Luke Bryan chuan “Coward of the County” hmangin a lo chhunzawm ve leh a ni.