Kurt Cobain thih aṭangin kum 26 a liam ta

90's tir lamah khan khawvelin a la hmelhriat em em loh Alternative rock peng pakhat 'Grunge' genre nen Nirvana chuan music khawvel a rawn run ṭan a, rimawi ngainatute'n an lawm phian mai. Mi ṭhenkhat phei chuan kha tih hun laia an uar em em 'hair metal' era ti tawptuah an chhal hial. Nirvana band chu miin an ngaisang a, a bikin an guitarist leh an vocalist  Kurt Cobain chuan lawm a hlawh zual.Mahse khawvel ngaihsan rawn Cobain chu mi hlim ber a ni hauh lo. An lar vanglai thleng chho mah se kum 1994 a inher chhuah meuh phei chuan a che buai chho tawh hle.

Hun a kal zel a, April 8 a rawn in herchhuah phei chuan khawvel deng chhuak dawt khawpa chanchin lungchhiat thlak chu thuthar theh darhtute'n an puan a ngai. 

' Seattle-ah Nirvana frontman Kurt Cobain ruang an chhar!!'

A hun laia miin an hriat dan chuan mi lar, mite ngaihsan rawn leh duh duh nei thei anga ngaitu an tam hle ang, mahse Kurt Cobain nun kawng zawh kha a awhawm bik hauh lo. Depression nei reng ṭhin a ni bawk.

February 20, 1967 khan Aberdeen, Washington-ah a piang a, kum kua lek a nih laiin a nu leh pa an inṭhen. Hei hian a nunah nghawng a ṭha lo zawngin a nei lian hle tih a nu ngeiin a hnuah a sawi nghe nghe. A tirah chuan a pa bulah a khawsa phawt a, mahse a high school a kal lai erawh chuan a nu bulah a khawsa thung.

High school chu a pass zo dawn lo tih a hriat avangin an 'graduate' hma kar hnih chiah la awmah a bansan a, a nu chuan hna i thawk dawn nge min chhuahsan dawn? tiin duhthlan tur a siam sak zui a ni. Hemi vang hian Cobain chuan a nu chu a chhuahsan a, awmna tur mumal nei loin a ṭhiante inah a riah kual loh leh an khuaa Wishkah luia lei dawh hnuaiah a riah changte pawh a tam niin amah ngei chuan a sawi.

The Polynesian Resort-ahte pawh hlawh tlemte neiin a thawk ve lawp lawp ṭhin a, Seattle–Tacoma International Airport-a cafeteria-ahte pawh a thawk ṭhin.

Rimawi lama a tuina a reh thei lo a, high school a bansan hnu lawkah kum 1985 khan Fecal Matter band a din a, mahse a kum leh lawkah an kehdarh leh nghal. Heng hunlai vel tho, high school a kal laia a ṭhiante band Melvins practice-naa a kal aṭanga a hriat Krist Novoselic nen hian kum 1987 khan Nirvana hi an din ta a, heta ṭang hian hlawhtling chho ṭanin khawvel hriat khawpin an lar ta a ni. 

Kum 13 lek a nih lai aṭangin 'marijuana' a ti tawh a, a puitlin hnu pawhin 'marijuana' hi chu a ti reng a ni. LSD, zu leh ruihhlo hrang hrang a  khawih nasa hle. Kum 1986 vel aṭang khan heroine a khawih ṭan a, a heroine ruih vang hian an band programme pawimawhah pawh a che chhe fo a, an perform hma lawka overdose-te pawh a nei a ni.

Kum 1994 a inherchhuah meuh chuan a che buai tawh hle. March 3, 1994 khan a nupui  Courtney Love chuan champagne leh Rohypnol overdose-in a hmu a, ni nga lai damdawi-inah enkawl zui a ni. Love chuan hei hi intihhlum a tum hmasak ber ṭum niin a sawi.

March 18, 1994-ah chuan silai nen room-ah a inkalhhnan avangin Love chuan police a phone a ngai hial a, a chet buai chhoh avang hian March 30 khan  Los Angeles-a rehabilitation center-ah ama rem tihnain an dah lut a ni.

Mahse a tukah rehabilitation center aṭangin a tlan chhuak a, Seattle lam a pan zui a, thlawhtheihnaah hian Guns N' Roses bassist  Duff McKagan bulah a ṭhu nghe nghe. Duff hian Cobain chu hlim hmel hle mah se thil fel lo a awm nia a hriat thu a hnuah a sawi a ni.

Hemi hnu hian a chhungte leh a ṭhiante chuan an zawng nasa hle a, April 3 vel thleng chuan Seattle-ah hmu tu an la awm a, hemi hnu hian hmuh zui a ni ta lo. April 7-ah Nirvana an keh darh tih thu a thang a, a tuk April 8-ah chuan  Lake Washington Boulevard-a a chenna in bula green house-ah a ruang hi an chhar ta a ni.

Cobain ruang hi hmuh a nih hian a beng aṭangin thi a chhuak a, shotgun-in a khabe a la in tin bawk. Report-ah chuan  April 5, 1994 khan kum 27 mi nia thi nia tarlan a ni a, a taksa chu enfiah a nih hnuah diazepam leh heroin a awm tih hriatchhuah a ni bawk.

Kurt Cobain hian thu hnutchhiah a nei a, hei hi a naupan laia a ngaihtuahnaa a ṭhian (imaginary friend) Boddah tana a ziah niin, kum tam tak chhung chu music ngaihthlak emaw siam emaw chu a hlimpui tawh lo tihte pawh a ziak tel  a ni.