India Box Office-ah-ah Amitabh leh Taapsee channa 'Badla' a hit

Bollywood superstar Amitabh Bachchan leh Taap­see Pannu te channa Badla chu tunlai Bollywood film en hlawh ber a ni mek a, sum pawh a lalut hnem hle.

Drama/thriller film Badla hi March 8 khan tlang­zarh a ni a, Amitabh Bach­chan channa a nih miau avangin Bollywood film ngainatuten an hmaih phal lo. Hei hian sum lakluh kawngah pawh nasa takin a pui a, vaibelchhe 30 chuang a lalut der tawh. Tlangzarh aṭanga ni nga chhunga a sum lakluh zat chu vbch 34 zet a ni a, hei hi tunah chuan a sang leh tawh ngeiin a rinawm.

Spanish film aṭanga lak
Indian film director Sujoy Ghosh-a kutchhuak 'Badla' hi Spanish film 'The Invisible Guest' aṭanga lak a ni a, Bollywood-ah her rem a ni. India mipui rilrem thei ang ber tur a ni a, a hlawhtling hle a ni.

Mystery/crime film The Invisible Guest hi 2017 khan tichhuah a ni a, Spain-ah chuan film en hlwh berte zinga mi a ni. A changtute hi Spanish star Mario Casas leh Bárbara Lennie te an ni a, hei hian hlawhtlinna an channa kawngah nasa takin a pui a ni.

Badla-ah pawh hian Bollywood-a huhang ngah pahnih Amitabh Bachchan leh Taapsee Pannu-te an chang a, fashion model Tony Luke leh Amrita Singh te an inlan bawk. Badla hi India bakah UK-ah pawh chhuah a ni tawh a, sum lakluh kawngah a chet ṭhat chhoh zel a rinawm. Badla bakah hian Total Dhamaal, Gully Boy leh Luka Chuppi te chu tunlai Bollywood film hit zual an ni.