Miley Cyrus album a hnai?

Kum 2017 khan 'Younger Now' album a tichhuak a, a reh zui deuh vang vang. Tunah erawh American singer Miley Cyrus hian album thar a sawi ri leh ṭan tawh a, a tichhuak leh dawn hnai a nih hmel hle.

Miley hian tun hnai khan hemi chungchang hi social media lamah a tarlang a, a studio album pasarihna tur a buaipui mek thu a sawi. Kum 26 mi Miley hi tun hma angin music khawvelah a thawm a na tawk tawh lova, 'Party In The U.S.A' anga hla hit pawh a nei ta meuh lo. A album thar hmang hian tun hma-a a lo ropui tawh ṭhinna ang kha a tawng leh thei ang em tih chu a hriat thuai dawn a ni.

Miley Cyrus hi hun rei tak a lo zui tawh Australian actor Liam Hemsworth nen nikum khan an innei a, music lamah thawm a rawn neih leh tak bawk avangin fans lam pawh an phur hle a ni.

Hetih lai hian Miley Cyrus hian tun hnai khan Instagram lamah a bialpa hlui Nick Jonas nena tun hma lama an thlalak hlui a post a, hei hi Nick Jonas pawh a thawn a, titi a tam hle. He thlalakah hian Miley Cyrus hian Jonas Brothers t-shirt a ha nghe nghe a ni.

Nick Jonas-a nupui Priyanka Chopra pawhin hemi chungchang hi sawiin, Miley Cyrus thlalak post avanga a buai loh thu a sawi.