Nobel Peace Prize dawng thei tur zingah Kum 16 mi GRETA THUNBERG

Khawvela chawimawina sang ber Nobel Peace Prize dawng thei tura chhawpchhuah zingah Swedish naupang Greta Thunberg chu a tel. Kum 16 mi Greta Thunberg hi climate ac­tivist niin, a hnathawha ropui tak avangin khawvelin a hmelhriat chho mek a ni.

Greta Thunberg hi Norwegian MP pathum te chuan Nobel Peace Prize dawng tur hian an nominate a ni. Greta chuan he mi chungchang hi sawiin, "Chawimawina ropui tak a ni," a ti. Amah hi zirlai mai a la ni a, khawvela chawimawina sang ber dawng thei tura chhawpchhuah zingah a hming a lan tak avang hian a chanchin hian ngaihven a hlawh thar hle.

Greta hian sik leh sa inthlak nasa lutuk dona kawngah beihpui a thlak a, school leh hmun hrang hrangah nasa takin a campaign a ni. Sweden leh khawvel hmun dang dangah pawh nasa takin a bei a, Nobel Peace Prize dawng thei tur hiala chhawpchhuah a ni ta a ni. He chawimawina hi a dawng thei a nih chuan Pakistan mi Malala Yousafzai khumin, Nobel Peace Prize dawng thei naupang ber a ni ang. Kum 21 mi Pakistani activist, Malala Yousafzai hian October 10, 2014 khan kum 17 mi lek niin he chawimawina hi a lo dawng tawh a ni.

Fridays For The Future
Greta hmalakna hian Fridays For The Future movement din a ni a, school hrang hrangin an thlawp. Nimin pawh khan ram 100 chuang zetah Fridays For The Future pual hian campaign neih a ni a, kawtthler 1,300 vel zet­ah strike an nei a ni. He hunah hian global warming leh climate change nasa lutuk duh lona lantir a ni.

Sweden bakah hian - Ger­many, Belgium, UK, France, Australia leh Japan-ahte chuan school tam takin Fridays For The Future movement hi an kal­pui a, zirna piah lamah sik leh sa danglam chak lutuk venna kawnga chak zawka hma lak a nih theih nan an campaign ṭhin a ni.

Greta hian nikum August thla khan an ram Paliament kawtah climate change nasa lutuk duh lohna lantir hian nawrh a lo huaihawt tawh a, heta ṭang hi chuan hnung lam hawi tawh lovin beihpui hi a thlak zui ta zel a ni.

Nobel committee chuan tun hnai khan Nobel Peace Prize dawng thei tura chawpchhuahte hi a puang a, ngaihven a hlawh hle. Khawvela chawimawina sang ber dawng thei tura chhawp­chhuah hi 301 niin, chung zinga 223 chu mimal an ni a, oranisation 78 zet an awm bawk.

Nobel Peace Prize dawng tur hi October-ah puan a ni dawn a, December khian Norway khawpui Oslo-ah sem a ni ang.

Tunge Greta Thunberg?
Greta Ernman Thunberg hi January 3, 2003 khan a piang a, a nu chu Swedish opera singer Malena Ernman niin, a pa Svante Thunberg erawh film star a ni thung.
Kum 15 mi a nihin sik leh sa inthlank danglam chak lutuk dona kawnga hma la turin ke a penchhuak a, an ram rorelna sang ber parliament kawtah 'School Strike for Climate' a kalpui. Hemi hnu hian Fridays For The Future movement dinin, Zirtawpni apiangin school kal lovin a campaign ṭhin.
A hma lakna hi a darh chak hle a, hun rei loteah an ram a deng chhuak. Zirlai tam takin a hmalakna hi thlawpin, kawttherahte campaign hi an nei ṭhin a ni.
A hmalakna hian ram dang pawh kangkai zelin tunah hian ram 100 velah kalpui a ni tawh a, school tam takin thlawpna lantirin kawngzawhte an huaihawt ṭhin a ni. Hei hian ram hruaitute beng pawh a thleng a, politician eng emaw zatin an thlawp thu an sawi tawh a ni.
Greta Thunberg hian nikum December thla khan TEDxStockholm-ah thu a sawi a, United Nations Climate Change Conference leh World Economic Forum, Davos, Switzerland-a neihah thu a lo sawi tawh bawk.