iHeartRadio Music Award thununtu Taylor Swift

Kum tina sem ṭhin iHeartRadio Music Award chu nimin zing khan Microsoft Theater, Los Angeles-ah sem a ni leh ta a, Taylor Swift chuan award ngaihlut ber pakhat Tour of the Year a la. 'Delicate' singer hian Best Music Video a la tel bawk a, iHeartRadio Music Award a thunun hneh hle.

Hetih lai hian American singer Ariana Grande chu Artist of the Year atan thlan a ni a, '7 Rings' singer hian Female Artist of the Year pawh a hui tel a ni. Candian rapper Drake chu Male Artist of the Year atan thlan niin, DJ Marshmello chu Best New Pop Artist award hla a ni bawk.

American singer Taylor Swift hian nikum May- November chhung khan Reputation Stadium Tour a nei a, a hlawhtling rem rem hle. Tour aṭang hian $mtd 345.7 zet a lalut a, tour nei tawh zinga hlawhtling ber pawl a ni. Hmeichhe singer bikah phei chuan sum lalut hnem ber niin, Tour of the Year award hlan a ni pawh hi a awm hle.

iHeartRadio Music Award-ah hian - Zedd, Maren Morris leh Grey-te chu award dawng langsar zingah an tel a, 5 Seconds Of Summer-te pawh an bang bik lo. Bruno Mars leh Cardi B-te chuan 'Finesse' vangin Best Collaboration an la a, an phu tih loh rual a ni lo.

Country lamah Luke Combs a langsar a, Country Artist of the Year award a la. Country Album of the Year chu Jason Aldean kutah hlan niin, Best New Country Artist atan Jordan Davis chu thlan a ni bawk.

Drake chu Hip-Hop Song of the Year atan thlan niin, Hip-Hop Artist of the Year award chu Cardi B kutah hlan a ni. Latin Artist of the Year chu Bad Bunny niin, Imagine Dragons ten Most Thumbed-Up Artist of the Year an la bawk.

Award ceremony-a perform Alicia Keys chu Innovator Award hlan niin, Garth Brooks chu Artist of the Decade atan puan a ni bawk.