Pawisa nei lo, leiba ngah si Queen!

Khawvela band lar ber zinga mi Queen hian kum 1975-a an album tlangzarh 'A Night at the Opera' kha hlawhtlinpui viau lo se chu, vawiinah hian Zoram mipuite hi chuan Queen chu tute nge an nih a, eng ang mi nge an nih kan hre kher lo mai thei!

An studio album palina, an hla hit tak tak 'Bohemian Rhapsody' leh 'You're My Best Friend' awmna album an tlangzarh hma khan sum leh pai an tlachham hle a, chumai a la ni lo, leiba an nei ngah hle bawk. Chutiang beidawnna kara beiseina mei de ve ve an neih chu chhem mit duh loin 'A Night at the Opera' kha an tlangzarh a, beidawng loa an beih ṭauh ṭauhna chuan rah ṭha a chhuah a, UK Album chart-ah topper hial an ni a, US Billboard 200-ah palina an ni bawk. He album hi an band platinum-certified album hmasa ber a ni zui bawk a ni.

Hemi chungchang hi Queen YouTube channel-ah guitarist Brian May leh drummer Roger Taylor-te chuan an sawi chhuak a ni. "Kan rethei a ni mai loa, leiba kan ngah hle a ni" tiin Brian May chuan a sawi.

"Sound leh lighting company bakah kan thawhpuite zawng zawng hlawh kha pek a ni lo. Chumi a nih avang chuan hun harsa takah kan ding a ni. Kha album kha hlawhtling lo se chu kan kehdarh hial ang. Album hautak tak a ni a, engtinnge khang thil ṭhenkhat kha kan tihhlawhtlin theih zawk tiin ka ngaihtuah let zawk a ni," tiin khawvelin a ngaihsan Brian May chuan a sawi hial.

Roger Taylor pawhin A Night At The Opera siam tura studio kan luh kha chuan, siam emaw kehdarh emaw kha duhthlan tur awmchhun niin a lang, a ti.

British rock band Queen hi kum 1970 khan London-ah an indin a, khawvela band hlawhtling ber zinga mi niin an record hi maktaduai 170-300 vel lai an hralh nia chhut niin, kum 2001 khan Rock and Roll Hall of Fame-ah lakluh an ni a, kum 2018 khan Grammy Lifetime Achievement Award hlan an ni tawh bawk.