‘Peaky Blinders’ star Helen McCrory a thi

‘Peaky Blinders’ star ‘Helen McCrory’ chu kum 52 mi niin Zirtawpni khan London-ah a thi.

McCrory pasal Billions actor Damian Lewis chuan Twitter kaltlangin a nupui thih thu hi a puang a, an chenna inah cancer vangin a thi tih a sawi a ni.

"Rilru na tak chungin ka nupui duhawm tak leh huaisen tak Helen McCrory chu thlamuang takin a chenna inah cancer vangin a thi tih ka puang a, a ṭhiante leh a chhungte kiangah thlamuang takin a kal a ni," tiin a sawi.

‘Peaky Blinders' en ṭhinte chuan Helen McCrory hi an ui hle ang tih a rinawm. Kum 1968 khan London-ah piangin Drama Centre-ah lemchan a zir a, kum 1990-ah lemchan luhchilhin a lemchan thiam avangin chawimawina pawh eng emaw zat a dawng a ni.

Harry Potter and the Deathly Hallows – Part 1 leh Harry Potter and the Deathly Hallows – Part 2-ah khan Narcissa Malfoy lemah changin James Bind Skyfall-ah khan a inlan bawk a, heng bakah hian film lar tak tak eng emaw zatah a inlan bawk.

Kum 2007 khan Damian Lewis nen inneiin fa pahnih an nei tawh a ni.