Hontrade International Ṭhazual Lengzem : Jonathan Lalengzauva a 'riang' rei lo

Pangzawl tlangval Jonathan Lalengzauva hian January thla khan a music video hmasa ber 'Ka riang ngei e' chu a tichhuak chauh a, tunah chuan Hontrade International Ṭhazual Lengzem chart-ah No.1 a hauh der tawh.

Mizo Idol star Jonathana hi Ṭhazual chart-ah a 'riang' hman meuh lo a - a hla hit hian thlan a hlawh hle. Thla tam pawh a liam hmain dinhmun sang berah a inhlangkai a, 'Ka riang ngei e' tih hla chu tunlai lengzem hla thlan hlawh ber a ni mek.

Jonathana hian he hla hi Mizo Idol intihsiakah pawh khan a lo sa tawh a, a aw nen pawh a inmil hle a ni. He hla hi Landry Vl Vena Khawlhring phuah niin, music track hi Thangbawiha, EME Recording kutchhuak a ni. Video hmuhnawm tak mai siamsaktu hi Hriatkima (Lianchhiari Picture) a ni thung.

Tun ṭumah hian chart hmasa lama pakhatna hauhtu Jojo chu pahnihna a ni ve thung a, Rpa Ralte ft G'nie te chu pathumna an ni. Jojo hian 'Tunah zawng' tih hla a larpui mek a, Rpa Ralte ft G'nie 'I la hria em' pawh hi tunlai lengzem hla lar ber te zinga mi a ni.

Fela Colney chuan 'Sensiari' tih hla hmangin palina a luah a, 'Satel lem' tih hla thiam taka satu Zomuanpuia chu top 5-ah a lang bawk. F. Zomuanpuia hian 'Satel lem' tih hla hi a sa thiam tak zet a, thlan pawh a hlawh hle a ni.

Nu a nih hnua rawn intuai thar leh mek Mami Varte chu parukna a ni a, Temami leh KR Robert ten an dawt. Mami Varte hian tun hnai khan ama hla phuah 'Duhaisam' music video a tichhuak a, Ṭhazual chart-ah a rawn lang nghal chat a ni.

Vawi eng emaw zat No.1 lo hauh tawh H.T Lalthanzami leh Kimkima te chu tun ṭumah hian top 10-ah an lang ve leh bawk a, a hnu khartuah an ṭang ve thung a ni.