Box Office : Captain Marvel khum thei la awm lo : A sum lakluh a pung tual tual
Captain Marvel chuan North American Box Office-ah a ṭum hnih nan ro a rel leh ta a, sum lakluh tam lamah khum thei an awm lo. Kar hmasa khan $mtd 153 lalutin chiang takin dinhmun sang ber a lo luah tawh a, tun ṭumah pawh $mtd 69.3 zet a lalut leh a ni.
Billion-mark a hnai
American actress Brie Larson channa Captain Marvel hi February 27 khan London-ah release a ni a, March 7 khan Russia-ah tihchhuah niin, sum tamna North America-ah pawh March 8 aṭang khan chhuah ṭan a ni. Box Office-ah hian tichhuah karin $mtd 153 zet a laut nghal a, tun weekend-a a lakluh nen chuan $mtd 200 a chuang der tawh a ni.
North America bakah hian ram hrang hrangah chhuah chhoh mek zel a ni a, sum pawh a thawk chhuak hnem hle. Tun thlenga a sum lakluh tawh zawng zawng hi $mtd 760 zet a tling tawh a, billion kai turin a mamawh tam tawh lo. Tun anga a kal tluang chho a nih chuan tun weekend hi chuan billioan-mark a kaichhoh hman rin a ni.
Hmeichhe lansarhna
Captain Marvel sawi chuan mitthlaah Brie Larson a lang nghal a, ani hi he film hlawhtlinna bulpui berte zinga mi tih loh rual a ni lo. He fantasy/science fiction film-ah hian role pawimawh ber a play a, a chevel a hmuhnawmin mit a tlung tak zet a ni.
Jude Law leh Samuel L. Jackson-te channa Captain Marvel film siamtute hi - American Anna Boden leh Ryan Fleck te an ni a, Anna Boden hi hmeichhia a ni. California chhuak Boden hi kum 42 mi chauh a la ni a, film khawvelah hriat a hlawh chho mek a ni. Captain Marvel a hlawhtlin theih nana ngaihtuhna sengtu a ni a, dah hnim chi rual a ni lo. Hemi hma hian 'Mississippi Grind' leh film dang eng emaw zat a lo siam tawh bawk a ni.
Wonder Park a inlar
Tun hnai film chhuak thar Wonder Park chuan Box Office-ah hmun pawimawh a chang nghal. He fantasy/adventure film hian $mtd 16 lalutin pahnihna a luah a, Five Feet Apart chuan a dawt. Drama/romance film Five Feet Apart hi March 15 khan release niin, $mtd 13.2 lai a lalut a ni.
How to Train Your Dragon: The Hidden World leh A Madea Family Funeral-te chu top 5-ah an lang a, No Manches Frida 2, Captive State, Lego Movie 2: The Second Part bakah, Alita: Battle Angel leh Green Book-te chu top 10-ah an lang bawk.