Jackie Chan inlar leh dawn

Film star tam tak zinga Mizote rilrua thi thei reng reng lo, Jackie Chan chuan film a chang leh dawn a, Chinese martial artist Wu Jing nen 'Clim­bers'-ah an changdun dawn.

Jackie Chan hi kum 64 mi lai a ni ve tawh a, lemchan khawvel chhuahsan erawh a la tum lo hle. 'Climbers' film-ah hian chang tura sawi rik a lo ni tawh a, tun hnai khan official-a puan a ni ta a ni. 'Rush Hour' star Jackie Chan leh Chinese martial artist lar Wu Jing-te changdun tur hi hmuh a chakawm tawh tak zet a, ngaihventu pawh an tam hle.

'Climbers' hi Chinese zinga khawvela tlangsang ber Mount Everest lawn chhuak hmasa pathum - Wang Fuzhou, Gonpo leh Qu Yinhua-te chanchin tarlanna tur a ni dawn a, Mount Everest an lawn chhuah dan hautak zet chu tarlan a ni ang.

Wang Fuzhou, Gonpo leh Qu Yinhua-te hian 1960 khan Mount Everest hi an lawnchhuak a, Chinese history-ah hmun pawimawh tak an luah a ni.

'Climbers' hi China-ah shooting neih a ni dawn a, nakkum lama tichhuah tur a ni.