Mystical Mizoram Ṭhazual GOSPEL-ah One In Christ 'Lalpa Ṭhatna' aia ṭha a awm lo

Mystical Mizoram Ṭhazual Gospel chart-ah One In Christ hla ngaihthlak hlawh tak 'Lalpa Ṭhatna' chu pakhatna a ni a, Hlimhlimi 'Aw Ropui Ber' chu pahnihna ni thungin David Vanlalpeka 'Davida Perhkhuang' chu pathumna a ni.

'Lalpa Ṭhatna' aia ṭha a awm lo
Nikum kum tawp dawnah khan One In Christ chuan 'Lalpa Ṭhatna' hi an YouTube channel-ah an dah chhuak tawh a, nimin thleng khan thlirtu nuai thum chuang a nei tawh. He hla mawi tak hi OiC leader Alvin-a'n sap hla 'Goodness of God' a lehlin a ni a, khawvel puma Pathianin a hman tak hla a ni nghe nghe.

'Lalpa Ṭhatna' hlaah hian Christina-i chuan part tam ber lain a sa nung hle a, fakna hla ngaihthlak manhla leh ngaihnawm tak, Pathian, a ṭhatna avanga fakna hla ṭha tak niin, Ṭhazual chart-ah pawh hian a mikhual tawh lo hle a, tunah phei chaun dinhmun ṭha berah a rawn ding ta a ni.

Music video hmuh a nuam a, a hla a ṭhat bakah OiC-te'n an sa thiam a, chart topper a ni pawh hi a phu hle a ni.

Hlimhlimi leh David Vanlalpeka
Nikum December thla tir lama Hlimhlimi'n a tihchhuah 'Aw Ropui Ber' chu pahnihna a ni a, chart hmasaah khan pathumna niin tunah chuan pahnihnaah a rawn inhlangkai ta a, a dinhmun ṭha bera ding tur pawhin a dinhmun a ṭha sawt hle.

Chart hmasaa pasarihna David Vanlalpeka 'Davida Perhkhuang' chu pathumnaah a rawn inhlangkai dawrh bawk a, dinhmun ṭha lehzual a ding dawn em tih chu hriat chawkawm tawh tak a ni.

Chart top 10-a langte chu
Ronnie & Boom 'Kalvari a Krista' chu palina niin Chanmari West Hmar Veng Br KṬP 'Puitu a Awm' chu pangana a ni.

Nghaktea Fanai 'Min Chhungkhat La' chu parukna a ni a, Pensy & Sanga Renthlei 'Ka Ṭawngtaina' chu pasarihna niin Stacy Punte 'Ka Ṭhatna Tur a Hria' chu pariatna a ni thung a, Nutei Chhakchhuak 'Nang I Awm Si' leh Jennifer Lalruatkimi 'A Chhun a Zanin' chu pakuana leh 10-na an ni ve bawk.