Hmeichhe thil tithei zual zingah Priyanka Chopra
US Today chuan entertainment huanga hmeichhe thil tithei zual a tarlang a, chung zingah chuan Indian actress Priyanka Chopra pawh a tel.
Priyanka hi khawvela hmeichhe thil tithei ber ber - Ellen DeGeneres, Meryl Streep, Beyonce leh Oprah Winfrey-te nen Power Icon List top 50-ah hian an lang a ni.
US Today hian Entertainment industry-a hmeichhe thil tithei zualte hi kawng hrang hranga zirchainna an neih hnuah an tichhuak a, top 50 chin an tarlang. Chung zingah chuan - Ellen DeGeneres, Beyonce leh Oprah Winfrey-te chu hming langsar an ni a, Meryl Streep leh Priyanka Chopra-te pawh a sang zingah an tel.
'Quantico' star Priyanka hi Bollywood mai ni lo Hollywood thlenga hriat hlawh a ni a, list-a a lang phak pawh hi thil mak a ni lo. Quantico bakah hian - Isn't It Romantic, A Kid Like Jake leh Dwayne 'The Rock" Johnson leh Zac Efron-te channa Baywatch-ahte pawh a lo inlan tawh a, Bollywood-ah sulhnu ropui tak a hnutchhiah bawk.
UNICEF Goodwill Ambassador Priyanka hi nikum khan Forbes 100 most influential list-ah a lo lang pha tawh bawk a, Variety 500 Most Influential list-ah telh a lo ni tawh bawk.
Top 50-ah hian singer leh actress an tam ber a, reality star pawh an katnuk. Beyoncé leh Jennifer Lawrence-te chu music huanga hming langsar an ni a, actress zingah Reese Witherspoon, Viola Davis leh Nicole Kidman-te chu an langsar viau bawk. Captain Marvel star Brie Larson pawh thil tithei zual zingah hian a tel a ni.
Media leh TV personality zingah Oprah Winfrey, Ellen DeGeneres leh Tina Fey-te chuan 'ber' nihna an hauh thung.