Covid-19: Miss England-in a crown dah ṭhain doctor hna chhunzawm
Miss England 2019 Bhasha Mukherjee chuan a Miss England crown chu dah ṭhain coronavirus dona kawnga a ṭangkai zawkna turin a doctor hna a chhunzawm.
Bhasha Mukherjee hi December 2019-a Miss World thlannaa an ram aiawha a chhuah hnu khan junior doctor a nihna chu chawlhsan lailawkin charity pawl hrang hrang ambassador-ah a ṭang zui a, a ruahmanna hmasaah chuan kumin August thla thleng hi chuan doctor hna thawk rih lo a; humanitarian work lama inthlurbing a tum a ni.
CNN-in an kawmnaah chuan Africa, Turkey, India leh Pakistan bakah Asia ram hrang hranga charity work kalpui ṭhinte chuan an ambassador atan an sawm tih a sawi.
March thla tirah pawh khan India ramah rawn zinin kar li chhung chu Coventry Mercia Lions Club ambassador niin hun a rawn hmang a, school hrang hrangah chhawmdawlna pein hmeichhe naupang, an nu leh pate'n an duh tawh lohte ṭanpuiin a thawk bawk.
Hetiang hi ni mah se a ram UK-in a mamawh a, UK-ah Covid-19 lengin nasa takin zual lam a pan ta si a, damdawi-in a thawhna ṭhin- Pilgrim Hospital, Boston, eastern England-a a thawhpui ṭhin nen an inbiak hnuah doctor hna chhunzawm leh tur hian thutlukna a siam ta a ni.
"Miss England crown khum chungin humanitarian work pawh thawk mah ila, khawvel hmun hrang hrangah coronavirus vangin mi tam tak an thi a, ka thawhpui ṭhinte rim takin an thawk tih ka hre bawk a, ka inthiam thei lo a ni," tiin a sawi.
Mukherjee hi Kolkata-a cheng ṭhin a ni a, kum 9 a nih laiin England-a Derby-ah an pem a ni a. Respiratory medicine lam specialize a ni nghe nghe.
England-ah hian Covid-19 vang hian mi 5,000 chuang an thi tawh a ni.