WHO's One World: Together At Home Shah Rukh Khan leh Priyanka Chopra tel ve dawn
World Health Organization (WHO) leh Global Citizen ṭangkawp chuan kar leh Inrinni, April 18-ah hian Covid-19 dona kawnga sum peipunna turin WHO's One World: Together At Home programme an buatsaih dawn a, hetah hian India superstar pahnih Shah Rukh Khan leh Priyanka Chopra Jonas pawh an tel dawn.
WHO's One World: Together At Home programme-ah hian khawvel huapa lar artist hrang hrang an inlan dawn a, live-a pek chhuah a ni ang.
He hunah hian A Star Is Born actress Lady Gaga, Lizzo, Elton John, John Legend, Billie Eilish leh mi dang eng emaw zat an perform dawn a ni.
April 18-a hun hman tur hi advocacy group Global Citizen leh Lady Gaga-te ṭang dunin bul an ṭan a ni a, tunah hian $mtd 35 an hmu chhuak tawh.
Priyanka Chopra chuan a instagram-ah hemi chungchang hi a tarlang a, a thlalak caption-ah Global Citizen nen chuan April 18-a neih tur, One World: #TogetherAtHome chu an phurpui tawh hle tih a sawi a, an sum hmuh chhuah chu WHO tan a nih dawn thu leh Covid-19 dona kawnga hman a nih dawn thu a sawi bawk.
"He zan bik tak hi Jimmy Fallon, Jimmy Kimmel, leh Stephen Colbert-te chuan an host dawn a; Lady Gaga, Coldplay, Elton John, John Legend, Lizzo, Billie Eilish, Stevie Wonder leh midang eng emaw zat an perform ang. Digital platform hrang hrangah PST dar 5-ah pek chhuak a ni dawn," tiin a tarlang bawk.
India ram hunah chuan April 19 zing dar 5:30-ah a ni daih dawn thung a, TV channel hrang hrang leh digital network hrang hrangah an pe chhuak dawn a ni.