ANGGU'S Management : Zaninah Mizoram Entertainment Award sem dawn

ANGGU'S Management chuan zanin dar 7:30 hian a vawi khat nan Mizoram Entertainment Award (MEA) an sem dawn. Award ceremony hi David's Kitchen, Chanmari-ah neih tur a ni dawn a, Entertainment Industry huanga mi hlawhtlingte hnenah chawimawina an hlan dawn a ni.

Mizoram Entertainment Award 2019 hi nomination committee-te'n ngun taka an ngaihtuah hnuah category hrang hrangah ṭhenin - Most Entertainer Artist of the Year, Most Iconic Sport Person of the Year leh Man of the Year te an thlangchhuak a, Most Outstanding Award leh Lifetime Achievement Award te an sem dawn bawk.

Entertainemt khawvela hriat hlawh tak tak te hnenah heng chawimawina te hi hlan a ni dawn a, Mizoram Entertainment Award hmasa berah hian - zaithiam, model leh film star te bakah, lamthiam leh infiammi te thlengin an kim hle dawn a ni. He hunah hian RJ leh VJ te pawh an inlan dawn bawk a ni.

Mizoram Entertainment Award sem rual hian ANGGU'S Group chuan ram tana hnathawk ṭha te hnenah a vawi hnih nan ANGGU'S Group Excellence Award a sem dawn bawk a, sorkar mi pawimawh te leh sumdawng lian te pawh an tel tura ngaih a ni.

ANGGU'S Group hian kum 2016 khan Mizo ṭhalai kum 25 hnuai lam, ram pawn thlenga mi hriat hlawha hlawhtlinna changte hnenah chawimawina award an lo hlan tawh bawk a ni.

Anggu's Management hi a tirah chuan Anggu's Group of Faith & Hope tih an ni a, kum 2016 khan Anggu's Management tiin thlak a ni.