India Box Office : Akshay Kumar channa 'Kesari' a hit nghal

Bollywood film chhuak thar Kesari chuan India Box a thunun nghal a, kumina film chhuak tawh zinga che ṭha ber a la ni.

Akshay Kumar channa Kesari hian tlangzarh ni la lain vaibelchhe 21.50 a lalut a, a hit tih loh rual a ni lo.

He drama/action film hi March 21 khan release a ni a, Bollywood khawvel a dengchhuak hneh hle. Anurag Singh-a kutchhuak film hi hmun hrang hrangah chhuah chhoh mek zel a ni a, a sum lakluh pawh a sang chho chak hle tura beisei a ni.

Hit ber mai chu
Kuminah Bollywood film chhuak a awm nual tawh a, an sum lakluh zat aṭanga teh chuan Kesari aia hit a awm chuang lo. Akshay Kumar leh Parineeti Chopra-te channa hi tlangzarh ni bikah chuan sum lalut hnem ber a ni a, Gully Boy leh Total Dhamaal ten an dawt.

Kesari hian vbch 21.50 lalutin dinhmun sang ber a luah a, Ranveer Singh leh Alia Bhatt-te channa Gully Boy chuan vbc 19.40 lalutin pahnihna a ni. Ajay Devgan, Madhuri Dixit leh Anil Kapoor ten fans an ngah zia a lang a, Total Dhamaal chuan vbch 16.50 zet a lalut ve bawk.

Heng film pathumte hian India bikah chuan tun lai superhero film lar Captain Marvel pawh an khum a, American actress Brie Larson channa hian chhuah ṭan niin vbch 13.01 chauh a lalut a ni.

Kesari hi true story behchhana siam niin, kum 1897-a British Indian Army leh Pashtun Orakzai, Afghanistan-te indo chanchin tarlanna a ni.