BLACKPINK YouTube-ah record an siam leh ta

Thla hmasa lawk khan You­Tube-a viewer ngah ber record an lo siam tawh a, an la duh tawk mai lo. South Korean girl group lar BLACKPINK hian K-pop zinga YouTube-a subscriber ngah ber record an siam leh ta a, maktaduai 20 zet an nei.

YouTube chuan BLACK­PINK record siam thar hi an puang a, lawmpuina leh duhsakna an hlan nghal bawk. Member pali awmna BLACKPINK hi K-pop zinga hetiang zat subscriber nei thei hmasa ber an ni a, mel lung pawimawh tak an phun leh ta a ni.

BLACKPINK-te hi an lar vet vet hle a, an music video 'Ddu-Du Ddu-Du' phei chu mi maktaduai 700 chuang zetin an en tawh a ni. Hei hi K-pop group zinga viewer ngah ber record a ni mek a, mimala viewer ngah ber erawh Psy 'Gangnam Style' niin, viewer tluklehdingawn 3.2 chuang a nei tawh a, an la phak lo hle a ni.

BLACKPINK-te hian an huang an zauh zel a, North America lamah phei chuan an lar tawh hle. A vawi khat nan Coachella Festival-ah an inlan dawn a, Billboard chuan cover girl atan an hmang bawk.