Lady Gaga leh Renner-te an riret ret!

Singer turned actress Lady Gaga leh 'Avengers' star Jeremy Renner-te chuan sawi zawm an hlawh mek a, thu chiang hriat tur erawh a la awm lo.

People magazine chuan American star pahnih hi tun hnaiah an inzui ngawrh hle niin an sawi a, an chhuak dun pawh hmuh tur an awm fo niin an tarlang bawk. Gaga hi a single lai a ni a, Renner lah nupui kawppui mumal nei loa a awm lai a nih bawk avangin an inkara 'ri ret ret' awm pawh hi thil mak a ni lo.

'A Star Is Born' star Lady Gaga hi kum hnih chuang zet an inzui hnuah February thla khan Christian Carino nen an inṭhen a, kawppui fumfe sawi tur a la nei leh lo. A Star Is Born-a a chanpui Bradley Cooper nen pawh sawi zawm an lo ni tawh a, Cooper erawh pawm lai nei a nih avangin an chanchin hi a reh zui.

Tun ṭuma an sawi zawm Jeremy Renner hian 2015 khan a nupui Sonni Pacheco a ṭhen a, kawppui bulfuk tak a la nei leh lo. Lady Gaga leh Renner-te hi ṭhian satliah chu an ni lo niin a lang a, tun lai media-te chaw tui ber pakhat an ni mek.