Box Office : Hripui leng karah sakawlh pahnih insualin $mtd 390.9 a lalut tawh

North America Box Office-ah thil danglam lian tham thleng a awm lo a, chart hmasa ang bawkin Godzilla Vs Kong-in ro a rel leh a, chart hmasa leh chart thar top 5-ah dinhmun inthlak thleng emaw pawh an awm lo a ni.

Godzilla Vs Kong a la vul zel
Sakawlh pahnih insualna film Godzilla vs. Kong chuan kar tawp liam taah khan theatre 3,001 aṭangin $7,847,227 lai sum a lalut leh.

He film hian North America Box office aṭang ringawt pawhin $80,657,654 lai sum a lalut tawh a, ram dang aṭanga a sum lakluh nen a sum hmuh chhuah tawh zawng zawng chu $390,957,654 lai a ni tawh a, he film en chaktute hian hripui nasa takin leng mah se theatre kal ṭhulh phahna atan an hmang duh chuang lo a ni.

Hripui len hnua US leh Canada-a $mtd 100 lalut tling thei film hmasa ber a ni dawn niin a lang ta a, HBO Max-ah he film hi a hmeh chhuah theih reng nachungin theatre aṭanga a sum lakluh hi a ṭhahnem tawh hle.

Danglam tam lo Box Office
Chart hmasa nena khaikhin chuan tun chart-ah hian thil danglam lian tham thleng a awm lo a, action film hmuhnawm tak Nobody bawk pahnihna ni lehin pathumna pawh chart hmasaa pathumna The Unholy bawk a ni leh.

Raya and the Last Dragon leh Tom and Jerry chu palina leh pangana an ni ve leh bawk.

Film thar erawh a awm nual
Chart-a pariatna In the Earth chu film thar a ni a, he film hi Top 10-a langphak film awmchhun a ni.

Film thar ngaihventute tan erawh tun chart hi chu hmuh a nuam deuh thung ang. Box Office Mojo chuan chart-ah film 44-a dah chhuak a, chung zingah chuan film thar pariat lai a awm. SAS: Red Notice (17), Trigger Point (23), Jakob's Wife (25), Monday (29), We Broke Up (31), Gunda (34) leh Bill Traylor: Chasing Ghosts (39)-te chu film thar langte an ni.