The Flash Movie logo hmuh tur a awm tawh

The Flash director Andy Muschietti chuan Instagram lamah The Flash Movie logo a chhawp chhuak ta a, hei hi production an ṭan tawh avanga dahchhuah a nih hmel.

Thawhṭanni khan a Instagram-ah DC film thar tur The Flash logo hi dah chhuakin a caption-ah “Here we go!!! THE FLASH Day 1. #theflashmovie” tih a hmang. He film hi an buaipui ṭanna a rei tawh a, tunah chuan an chang ṭan ta tak tak a ni. Christina Hodson chuan script a ziak a, November 4, 2022-ah en theih tura chhawp chhuah hman an tum.

Justice League film-a Flash lema chang Ezra Miller chu khawvela mihring che rang ber lemah hian a chang leh dawn a, report ṭhenkhat aṭanga a lan dan chuan Michael Keaton leh Ben Affleck Batman pawh he film-ah hian kan hmu dawn niin a lang a, Sasha Calle chu Supergirl angin a inlan dawn niin ṭhenkhat chuan an tarlang bawk.

Zack Snyder's Justice League-a kan hmuh zuai Kiersey Clemons pawh a inlan leh dawn a, Iris West lemah a chang dawn a ni.