Lemchan khawvela mi ropui 007 ti James Bond-tu Sean Connery a thi

Sean Connery tih hming han lamrik hi chuan ṭhalai lam mai ni lo, rual u zawkte pawhin an bengkhawn nghal vat ngei ang. Lemchan khawvela mi ropui, academy award hial pawh lo dawng tawhtu meuh pawhin thihna a pumpelh thei bik si lo a, kum 2000 kuma Queen Elizabeth II-in Knighthood nihna a lo hlan tawh Sir Thomas Sean Connery chu piallei hnuaiah zalh a ngai ve ta a ni.

Connery thih thu hi Inrinni khan a chhungte chuan puangzarin, a thih chhan tak chiang takin sawi lang lo mah se a fapa Jason Connery chuan hun eng emaw chen a damloh tawh thu a sawi a, Bahamas-ah a thi tih erawh an puangzar thung.

Jason Connery chuan a thih laiin a chhungte eng emaw zat an awm thu sawiin hrilengin ziaawm lam a pan hunah a pa hriatrengna pualin hun buatsaih an tum thu a sawi bawk. Sean Connery hian a nupui Micheline bakah a fate pahnih Jason leh Stephane a kalsan a ni. 

Sir Sean Connery hi James Bond film vangin lar hle mah se film lar tak tak dangah pawh a inlan nasa hle a,  Indiana Jones and the Last Crusade, Untouchables leh Dragonheart-ahte pawh inlanin Untouchables vang hian academy award-te pawh a dawng hial. Sulhnu ropui tak tak lemchan khawvelah a hnutchhiah hnuah kum 2006 khan lemchan a chawlhsan thu a puang.

Scottish actor niin kum 2004 khan  Sunday Herald-in poll a siamah "The Greatest Living Scot" atan thlan a ni a,  EuroMillions survey 2011-a neihah chuan  "Scotland's Greatest Living National Treasure"-ah puan ni lehin People Magazine phei chuan kum 1989 khan "Sexiest Man Alive"-ah a lo thlang daih tawh a,  kum 1999 khan "Sexiest Man of the Century"-ah a thlang zui leh bawk.

Kum 1987 khan France aṭangin  Commander of the Order of Arts and Letters a dawng a,  1998 khan  British Academy Film Fellowship dawng bawkin kum 2000 khan Queen Elizabeth II chuan Knighthood nihna a hlan bawk a ni. Amah hi UK aṭanga Scotland indan duh party  Scottish National Party (SNP) member a ni nghe nghe. 

James Bond hming a rik hi chuan mi tam tak mitthlaah chuan Sean Connery hi a lang ngei ang. A awm pawh a awm viau e. Kum 1962-a James Bond film hmasa ber Dr. No-ah khan 007 lemah a chang nghal chat a, a inhmehin lar pawh a larpui hle. Film siamtute pawhin tifuh an inti bawk a niang, 1962 leh 1967 inkara James Bond film an siam-  From Russia with Love, Goldfinger, Thunderball leh You Only Live Twice-ahte khan a chang chhunzawm leh zat.

Kum 1969-a On Her Majesty's Secret Service tihchhuah a nih khan George Lazenby chuan han thlak ve zawk mah se 1971-a Diamonds Are Forever chan a nih dawn meuh kha chuan film siamtu lam pawhin Connery bawk an chan tir leh a ni. Chutah chuan an la duhtawk mai lo a, non-official film Never Say Never Again kum 1983-a tihchhuahah pawh khan Sean bawk hi an chan tir leh a ni. Roger Moore nen khan 007 film pasarihah an inlan ve ve a, anni pahnih hi rual u zawkte James Bond duh ber pawh an ni ti ila kan sawi sualin a rinawm loh.

•    Dr No (1962)

•    From Russia with Love (1963)

•    Goldfinger (1964)

•    Thunderball (1965)

•    You Only Live Twice (1967)

•    Diamonds are Forever (1971)

•    Never Say Never Again (1983)

1987    :    Commander of the Order of Arts and Letters from France

1998    :    British Academy Film Fellowship

1999    :    Kennedy Center Honors

2000    :    Received Knighthood from Queen Elizabeth II

2005    :    European Film Awards Lifetime Achievement Award

2006    :    AFI Life Achievement Award