Thla 12 chhunga album pathum, topper nihpui thei Taylor Swift

Billboard 200 chart-ah Taylor Swift album tlangzarh thar 'Fearless (Taylor's Version)' chu pakhatna a ni a, heti hian Swift hian thla 12 chhungin Billboard 200 chart-a pakhatna ni thei album pathum a nei a ni.

He album hi kum 2008-a a tlangzarh tawh 'Fearless' album-a hlate a record ṭhat leh kha niin, hla thar paruk a dahtel bawk. A album tlangzarh tawh, copyright chungchang vanga a label hmasa nena an inkar a fel theih loh avanga a record ṭhat leh hlate mah nise Taylor hian chart-ah pakhatna a nihpui leh tho a, hei hian US mipuiah a tlaknatzia a tichiang hle awm e.

'Fearless (Taylor's Version)' hian equivalent album unit 291,000 lai a hmu chhuak a, a album tlangzarh leh avang hian Artist 100 chart-ah pawh pakhatna a nih phah bawk a ni.

Nikum July thlaah khan Folklore a tlangzarh a, December khan Evermore tlangzarh leh bawkin April 9 khan Fearless (Taylor's Version) a tlangzarh leh a, Folklore a tlangzarh aṭangin kum khat em pawh la liam lo mah se heng a album pathumte hi Billboard 200 chart topper a nihpui vek thei a ni.

UK chart: The Beatles khumtu Taylor Swift
Taylor Swift album thar hi Official U.K. Albums Chart-ah pawh topper a ni mek a, hemi hmang hian The Beatles record lo siam tawh chu a khum.

English band ropui The Beatles-in kum 54 chhung lai record an lo humhim tawh chu Taylor Swift hian a rawn khum a ni. The Beatles hian ni 364 chhungin UK Album Chart-a pakhatna ni thei album pathum an tichhuak thei a, hetiang record siam thei hi kum 54 liam ta chhung khan an awm lo. Mahse, Taylor Swift chuan he record hi rawn khumin ni 259 chhungin album pathum UK Album Chart-ah topper a nihpui a ni.

Billboard 200 chart-ah DMX pahnihna a ni
April 9-a thi ta rapper DMX chu Billboard 200-ah pahnihna niin kar hmasa lama 73-na a nihpui 'The Best Of DMX' chu pahnihnaah a rawn invawrh a ni. DMX hian uitu a ngah a, hei vang hian a hlate pawhin ngaihthlak a hlawh thar leh hle a, Artist 100 chart-ah pawh pahnihna tho a ni bawk.

Kar hmasaa pakhatna Justin Bieber 'Justice' chu pathumna a ni thung a, Morgan Wallen-a album 'Dangerous: The Double Album' chu palina niin pakhatna pawh lo ni tawh Rod Wave "SoulFly' chuan top 5 a khar a ni.

The Hot 100
Billboard Hot 100 chart-ah chuan Polo G 'Rapstar' pakhatna a ni a, Lil Nas X hla lar tak 'Montero (Call Me By Your Name)' chu pahnihna niin kar hmasaa pakhatna Silk Sonic (Bruno Mars & Anderson .Paak) 'Leave The Door Open' chu pathumna a ni.

Pakhatna pawh lo ni tawh Justin Bieber Featuring Daniel Caesar & Giveon 'Peaches' chu palina ni thungin The Weeknd 'Save Your Tears' chu pangana a ni bawk.