Mizo nula CT-i

Mi dang tana thil ṭha tih a, mite tana malsawmna nih theih hi kan duh vek mai a, mahse, thil awlái a ni lo fo. Covid-19 hripui vei mekte hnaih záwng phei chuan thil harsa leh nuam lo tak a ni–natna ṭihbaiawm tak leh kaihhnawih tam tak nei a ni miau a. Ruantlang nula CT-i erawh chuan ngaihtuahna dang a nei a, hripui vei mek, kum 93 mi tar chak tawh lo tak awmpuia enkawl turin a inpe tlat!

CT-i hi a lái-ah hming chu CT Ramnunmawii a ni a, Champhai Ruantlanga Thangluaia (L) leh Lallawmsangi te fa pakua zinga a pang ber a ni. Tunah hian Lloyd Law College, Delhi-ah LLB a zir mek a, chawlh hmanga a rawn haw lai a ni.

April 6-a a rawn haw tirhah Lengpui Airport-ah RAT hmangin a swab sample endik a ni a, a negative. A hnuah RT-PCR hmangin April 8-ah a sample endik leh a ni a, a negative leh bawk. April 8 zan lamah erawh a khua a sik ṭan a, a tuk ni 9-ah phei chuan a tho chhuak meuh lo a, April 10-ah a sample endiktir lehin, positive tih hmuh a ni ta a ni.

April 10-ah hian Covid-19 positive-te enkawlna hmun (CCC) pakhat, Durtlang BSUP-ah dah luh nghal a ni a. CCC-a a awm chhung hian a ṭha chho a, symptom pawh a nei tawh lo a. April 20-a sample endik leh tur niin, a negative chuan chhuak mah tawh turah a inngai.

Mahse, a sample endik nawnna tur thlen hma ni, April 19-ah pitar kum 93 mi, baihvai tawh tak mai an dah lut ve leh tlat mai a; a tum angin a awm thei ta lo.

CT-i chuan pitar baihvai tak mai dah luh thar a awm tih a hriatin, a beng a verh zar mai a, ngaihven ngei ṭulin a hria a, awmpui a ngai a nih phei chuan awmpuia enkawl turin a rilru a siamfel nghal a. Damlo enkawltu nurse-te a dil hnuah, an phalsak angin a enkawl chho ta a ni.

"Ka pi hi Lalsiami a ni a, Tahan, Burma aṭanga lo kal a ni. April ni 19 tlaiah an rawn dah. Hemi tlai hian a chanchin ka hriatin, an room-ah ka kal nghal a, amah a lo tar ve tawh nen, BSUP-a an rawn dah chhan pawh hrethiam thei loin haw a ngên a. Ka lainat êm a, amaha awmtir chi a ni lo tih ka hria a, amah enkawl turin ka inpe ta a ni," tiin CT-i chuan a sawi.

CT-i hi April 20-ah a sample test nawn tura tih ni mah se, Covid-19 positive dah thar a enkawl zui tak avangin endik nawn a ni ta rih lo a, a pi nen a rualin sample endik nawn a ni ang. "Keimahah harsatna ka nei tawh lo. Ka pi pawh a dinhmun a ṭha tawh viau a, ka pi chhuah theih hun hun hi ka chhuah hun tur chu a ni mai," tiin Vanglaini a hrilh.

CT Ramnunmawii hian PUC-ah B.A (Geography) a zir ṭhin a, a subject bikah hian B.A final year-ah MZU hnuaiah pakuana a ni nghe nghe. Nula chhuanawm tak, Pathian thua tui em em mai a ni a, PUC-a a zirlai pawhin Evengelical Union (EU)-ah a theihtawpin a inhmangin, EU-ah finance secretary a ni ṭhin a, college hrang hranga EU-te intélkhawmna páwlah treasurer a ni ṭhin bawk.