NASA-in ‘Cosmic Rose’ thlalak an dah chhuak

National Aeronautics and Space Administration (NASA) Hubble Space Telescope official Instagram enkawltute chuan Nilaini khan 'Cosmic Rose' thlalak a duh apiang tana en theih turin an dah chhuak.

Van thengrenga awm Pathian thilsiam hrang hrang tuipuitu i nih a, zana arsi leh van lam thlir nuam tiṭhin tan chuan NASA-ina thlalak an dah chhuah hi hmuhnawm tak tur a ni.

NASA Hubble IG account enkawltute'na thlalak an post hi 'interacting galaxies Arp 273' a ni a, galaxy inhual vel chuan cosmic rose niawm tak an siam a, a laia arsi hlawm khawm engmawi tak mai hmuh tur a awm bawk.

An thlalak post hi a caption-ah an thlalak dah chhuah chu 'interacting galaxies Arp 273' a ni tih an tarlang a, kum 10 liam taa mi tawh a nih thu leh light-year maktaduai 300 vel zeta hlaa awm a nih thu an tarlang tel a, 'He rose hi Andromeda constellation-a galaxy awmte siam a ni,' an ti.

Arp 273 hi galaxy pahnih invial a ni a, pakhat zawk, a lian zawk chu UGC 1810 tih niin, a hnuai zawka mi leh a te zawk chu UGC 1813 a ni thung.

NASA hian UG account hrang hrang an nei a, chungahte chuan thlalak hrang hrang, vansang aṭanga khawvel hmun ṭhenkhat landante bakah van thengreng thlalak hmuhnawm tak tak an tarlang ṭhin a ni. Heng thlalak tam takte hi International Space Station-a NASA astronaut-te lak a ni ṭhin.