Asian zinga hmelṭha ber Wu Jing & Lisa

British film critic TC Candler chuan kum tina an tih ṭhin angin Asian zinga hmelṭha ber an thlang leh ta a, Chinese actor Wu Jing leh BlackPink singer Lalisa Manoban (Lisa) te chhing zo an awm lo.

Kum 44 mi Wu Jing leh Lisa (22) te hi Most Handsome Man & Beautiful Woman for 2018 atan thlan an ni a, list-ah hian milar tak tak an kat nuk a ni. Chung zingah chuan BTS singer Jungkook leh Japanese actor Yuki Furukawa te pawh an tel a, Bollywood zingah Aamir Khan a langsar viau bawk.

'Wolf Warrior' star Wu Jing hi China-ah chuan a lar vet vet hle a, Asia khawmualpuiah pawh vawrh lar berte zinga mi a ni. A hmel pa tak mai chuan a film channa kawngah pawh hlawhtlinna tamtak a lo chantir tawh a, Martial artist ropui tak a ni bawk.

BlackPink lar zia sawi nawn a ngai lo, an band member-te pawh hmuh nuam tak tak vek an ni. Chung zinga langsar ber chu Lisa niin, Asian hmeichhe zinga hmelṭha berah thlan a ni ta a ni. Lisa hi South Korean hmeichhe zinga Instagram-a follower ngah ber niin, maktaduai 15 chuang zetin an follow a ni.

Asian mipa hmelṭha zual thlan chhuah zingah hian BTS singer Jungkook leh Japanese actor Yuki Furukawa te pawh an lang a, pahnihna leh pathumna an hauh. Bollywood superstar Aamir Khan chu palina a ni a, Japanese figure skater Yuzuru Hanyu chu top 5-ah a lang bawk.

Hmeichhe lamah Japanese actress Satomi Ishihara chuan Lisa hnung a zui a, Chinese teen idol Yang Chaoyue chu top 3-ah a lang ve bawk. Taiwanese singer Tzuyu chu palina a ni a, Japanese singer Sakura Miyawaki chu pangana-ah a awm thung.

TC Candler hian 1990 aṭang khan khawvel huapin hmelṭha thlanna hi an lo kalpui tawh a, khuamualpui hrang hrangah an thlang ṭhin bawk.