Pasal neih inring ngai lo Sophie Turner

American monthly magazine lar Rolling Stone chuan tun hnai khan Game of Thrones (GOT) star So­phie Turner an interview a, mipui bengverh tak thu a sawi chhuak.

English actress Sophie Turner chuan, "Tun hma chuan pasal neih hi ka rilruah awm ngai lo a, single-a hun hmang tluan turin ka inngai ṭhin," tiin a sawi mauh mai. He a ngaihdan hi Joe Jonas chuan a thlak sak ta niin a lang a, tunah chuan pasal nei turin a rilru ngaihtuhnate pawh a seng leh thei tawh a ni.

Kum 23 mi Sophie Turner hian hmangaihna kawng chhuk chho tak a lo zawh ve tawh ṭhin a nih a rinawm a, chu chuan pasal nei lo tura inngaihnate pawh a neih tir hman a ni ngei ang. Kum 2016-a Joe Jonas nen an intawn hnuah erawh thil a danglam ta a, a lungdumtu tak a tawng hian a rilru suk thlek pawh a tihdanglam sak ta a ni.

Turner chuan, "Ka kawppui tur mi ṭha tak ka tawng a, engkim in hria e. Tunah chuan rilru pawh a puitling tawh a, ka ngaituahna pawh kum 27/28 mi ang mai niin ka hre ṭhin," tiin, a puitlin tawh thu a sawi bawk.

Joe Jonas leh Sophie Turner te hi 2017 khan an inhual a, hetih lai hian Turner hi kum 21 mi chuah a la ni. Joe Jonas nen hian inneih an tum hnai niin sawi a awm a, tun nipui chhung hian an inkutsuih dawn nia tarlang pawh an awm a ni.