UK National Film Award-ah Idris Elba a ropui

Nilaini zan khan UK National Film Award chu Porchester Hall, London-ah sem a ni leh ta a, British actor Idris Elba chu mimala langsar ber a ni.

Film director ni bawk Idris Elba hi Best Director award hlan a ni a, a film siam Yardie chu Best Drama atan thlan a ni bawk. 'Pacifim Rim' star Idris Elba hian lemchan khawvelah mi bik a nih zia a pholang nawn a, a changtu mai ni lo, film siamtu nih pawh a tlin hle tih a lang.

Kum 46 mi Idris Elba hian a vawi khat nan film a siam a, nikum August thla khan release a ni. A kutchhuak hmasa ver 'Yardie' hian National Film Award-ah chawimawina ngaihhlut ber zinga mi a la a, Best Director a nihpui hial bawk.

Sherlock Gnomes
Animation film Sherlock Gnomes chuan Best Animation Film a la a, Black Panther chu Best International Film atan thlan a ni. Sherlock Gnomes hi nikum March thla khan release a ni a, sum pawh a lalut hnem hle a ni.

Award ngaihhlut Best Actor leh Best Actress-te chu 'The Happy Prince' star Rupert Everett leh Sophie Kennedy Clarke-te chuan an la. Scottish actress Sophie Kennedy Clarke hi drama film 'Obey' -ah a inlan a, a larpui hle a ni. 'The Intent 2' star Justin Clarke chu Best Newcomer atan thlan a ni bawk a, a channa Intent 2 hian Best Action award a dawng a ni.

Best TV Drama Serial-ah Collateral thlan niin, Best Independent Film chu Dead Ringer a ni a, British film ṭha berah Scott & Sid chu thlan a ni bawk.

Comedy lamah The More You Ignore Me a langsar a, Best Comedy atan thlan a ni. Best Breakthrough Performance chu Justin 'Ghetts' Clarke niin, Best Feature Film chu Gloves Off-in a hi ve thung a ni. Hetih lai hian Kristian Brodie chu Best Producer award hlan ani bawk.

UK National Film Award hi kum 2014 aṭang khan sem ṭan a ni a, British mi leh sa-te hnenah kumtin hlan ṭhin a ni. He award hian hriat a hlawh chho viau a, kuminah pawh mi maktaduai 2.5 chuang zetin vote an thlak a ni.

UK National Film Award Winner
Best Animation Film : Sherlock Gnomes
Best International Film : Black Panther
Best Director : Idris Elba
Best Actor : Rupert Everett
Best Actress : Sophie Kennedy Clarke
Best Newcomer : Justin Clarke
Best Drama : Yardie
Best Action : Intent 2
Best Independent Film : Dead Ringer
Best British Film : Scott & Sid
Best Comedy : The More You Ignore Me