Facebook-in an ham strick zual dawn!

Tun hnaia New Zealand-a mosque beihna rapthlak tak avang khan Facebook chuan khauh zawka kal an tum thu an puang.

Hemi chungchangah hian tun hnai khan thuchuah an siam a, helna rawngkai reng reng block zel a nih tur thu an sawi. Hei bakah hian chi inthliarna rawngkai khapna kawngah khauh zawka hma lak a ni dawn a, inṭhen hranna leh chi bil lam chi reng reng uluk takin an thlifim tawh dawn a ni.

Company lam chuan he an hmachhawp lian tak hi karleh aṭangin kalpui ṭan a nih tur thu sawiin, Facebook bakah Instagram pawh a huam tel ang.

New Zealand-a mosque beihnaah khan pawi khawituin a chevel hi Facebook-ah a live a, hei hi company lam chuan an ngai thutak hle a ni. Facebook-ah live video kha a darh nasa hle a, darkar 24 chhungin maktaduai 1.2 zet chu block a ni. Heng bakah hian upload tawh sa 300,000 vel zet chu paih a ni bawk.

Facebook chuan mipui hmuh theih tura khatiang thil rapthlak tak pholan a ni kha pawi an tih thu sawiin, a thlen nawn tawh loh nan theihtawp an chhuah tur thu an puang a ni.

New Zealand Prime Minister Jacinda Ardern pawhin kha thil thleng avang khan Facebook demna thu a sawi chhuak a, fimkhur zawka kalpui turin a lo ngen tawh bawk.