Mizo film chhuak thar tur 'NORAH' shoot zawh a ni ta

Leitlang Pictures production siam Mizo film 'Norah' chu ngawrh taka thla thum chhung an beih hnuah shooting zawh fel a ni ta.

'NORAH' hi kum 1935-a Samuel Hopkin Adams-a'n a ziah 'Night Bus' short story behchhana siam niin, film-a siam tur hian a script her rem a nih bakah phuah belh a awm bawk. He film hi Mizo rilrem tur leh kan society mil tur zawnga siam rem a ni bawk. Script leh screen play hi Mimi Lalnunfeli leh Mapuia Chawngthu-te siam a ni.

A story chu...
A story hi minister fanu duat sual tlanbovin a kal kawnga thil tam tak ala hriat ngai loh a tawn leh intawn harh dan bakah, khawvel kalphung a zir chhuahdante leh a zinkawnga hmangaihtu tlangval fel tak tak a chhar chhoh dan chanchin a ni. He film hi romantic comedy genre-a sengluh theih a nih rualin, drama leh action pawh hmuh tur a awm nual dawn a - naupang aṭanga puitling thleng pawha en theih tura buatsaih a ni.

A film sei zawng hi darkar 1 leh a chanve aṭanga darkar hnih inkarah khunglen tum a ni a, en manhla tur tak a ni.

Technical lam hi...
Mizo film sawi tawh chuan rilruah Mapuia Chawngthu a lang nghal ṭhin a, tun ṭumah pawh hian ani hi a hnarkaitu ber a ni. Mapuia (Leitlang Pictures) hi director niin, camera leh editing a khawih. Amah pui tur hian director of photography-ah Vanropuia Pachuau leh Malsawma Fanai (M_Space)-te an awm a, costume designer Numami 'Magic N' leh makeup artist Mawitei-te an la awm cheu bawk.

A changtute
He film-ah hian hmelthar eng awm zat hmuh tur an awm dawn a, mipui hmelhriat sa leh lar sa pawh an kat leh nuk dawn. Lunglei nula Esther Lalrinpuii Chawngthu chuan Norah role a play a, ani hi Where (Human Trafficking) film-ah pawh khan a chang a ni. Leading actor hi Isaak chhakchhuak niin, ani hi Damna kim film-ah khan a lo inlan tawh bawk a, zaithiam Bethsy Lalrinsangi nau a ni.

Heng bakah hian awmpui thinchhia Siam­tea, Papuia Pachuau, Mimi Lalnunfeli, Jonathan Lalmuanpuia (Mr. Mizoram India 2019) leh zaithiam David Lalzawmliana-te pawh a changtu zingah hian an tel a ni. A changtute hi screen test paltlanga uluk taka thlanchhuah vek an ni.

Shooting
NORAH hi CK HYUNDAI produce niin, bud­get pawh a tlem lo hle. Shoot hautak leh harsa tak tak a awm nual a, shooting naa inhliam palh pawh an awm a ni. Shooting hi Lunglei leh a chhehvel bakah Lawngtlai leh khaw dangahte neih a ni.

Shooting hi a hautakin mihring an mamawh hnem a, mipui lan tamna scene ṭhenkhat-ah hian Salvation ṭhalaite leh Home League-te rawih an ni.

April-ah?

NORAH hi release hun tur chiang taka sawi theih la ni lo mah se, April thla chhunga tihchhuah hman tum a ni. Shooting zawhfel a nih rual hian editing pawh khawih zui nghal niin, background music leh visual effects lamte khawi mek a ni bawk.

Mizo film danga la awm ngailo hmuh tur a awm nual dawn a, scene ṭhenkhatah hian visual effects pawh hmuh tur a awm dawn. Sound & light lamah pawh a duai dawn lo hle a ni.