Rd-i 'Ladylicious' kan chan ta

Mizote'n hmeichhe rapper kan neih hmasak ber zinga mi Vanrodinpuii (Rd-i) chu Ningani zan dar 10:20 khan chhul Cancer natna avangin kum 34 mi niin a thi.

Rd-i, Ladylicious tia kan hriat bawk hi Mizo hmeichhiate tana rap music-a sulsutu a ni a, hmahruaitu a ni. Kum 15 bawr vel liam taah khan Ethel Varte nen 'Duhlai' music video rawn tichhuakin he hla hmang hian Zoram rimawi khawvelah ke a rawn pen lut a, talent a neih ṭhat zia Zofate'n kan hre nghal a, demand channel hunlai phei chuan hla lar ber pawl a ni a, a hunlai ṭhalaite zingah chuan he hla hi hre lo pawh an awm lo hial awm e. Hemi hnu hian rap music-ah zuan luh chhunzawmin hla eng emaw zat a tichhuak a, a hla tihchhuah apiang a hit emaw tih mai tur a ni a, a fam ta mai hi Mizo Hip Hop community tan phei chuan channa nasa tak a ni.

Kum 10 dawn lai thawm a neih loh hnuah kum 2019 kum tawp dawnah khan rimawi khawvelah rawn zuang lut lehin single thar 'Bold V-2' a rawn tichhuak leh a, Zofate'n Rdi rap kan lo la ngaithla kham lo tih a hriat a, he a music video pawh hian YouTube lamah thlirtu a ngah chak hle a, Ṭhazual chart lamah pawh topper-te hial rawn ni lehin, thawm a rawn nei ring leh hman hle a, mahse Ningani zanah khan cancer natna avangin a boral ta a, mi tam takin an ui thu pawh an tarlang nasa hle.

Rimawi khawvela a rawn let leh khan YouTubers lam pawhin an interview nasa hle a, The Friday Show-in a interview-na nikum July thlaa a tihchhuahah khan a nu boral aṭanga kar khat liam hnu velah a insawisel ṭan thu sawiin, hemi avanga damdawi-ina a inentir hnuah biopsy-te an la a, chutah chuan a cancer tih an hriat chhuah thu a sawi a ni.

'Ladylicious' hi Mizo hmeichhe rapper zinga album tichhuak hmasa ber a ni a, a awm chhun pawh a ni hial mai thei. Music video a tihchhuah zawng zawng deuhthaw hi a larpui vek ti ila kan sawi sualin a rinawm loh. Ethel-i nena an music video hmasa ber 'Duhlai' a larpui zia sawi nawn a ngai lo a, 'Daddy' phei chu mi tam tak hnuk tiulhtu a nih kha. 'Mengmawi' leh 'BOLD' bakah Reubena nena an tihchhuah 'I tan hmun a awm' tihte pawh kha a hla tihchhuah lar zual an ni a, heng bakah hian hla hit tak tak eng emaw zat a tihchhuak bawk a ni.

Music lama a telna pawl Music Domain Mizoram chuan,

"Mizote'n 'Queen of Rapper' tia

i sakhming kan sawi laiin....

Van kohna min chhansan hi hriatthiam har kan ti!

Kan ui in kan ngai em em che.

I sulhnu zuiin ke kan pen zel dawn e!"

tiin Rd-i hi an thlah.

Rd-i hian a fate pahnih a kalsan a, nimin chhun dar 12 khan Aizawl Chanmari West YMA Zawlbukah vui liam a ni.