Hayley Williams-in Paramore album thar tur a sawi em ni?

American rock band hun eng emaw chen thawm lian tham nei ta lo Paramore chuan album thar an buaipui mek a ni mai thei! An singer Hayley Williams post siam aṭangin Paramore hian album thar an buaipui mek nia ngai an tam hle.

Williams chuan tuhnai khan social media lamah an drummer Zac Farro nena an inbiakna screenshot a post a, hetah hian 'paramore 6' tih hmuh tur a awm. Hemi avang hian an fan-te chuan an album parukna tur an buaipui niin an ngai a, an ring dik mai thei bawk a ni.

Kum 2017-a 'After Laughter' an tihchhuah hnuah khan Paramore hian thawm an nei zui lo hle a, Hayley-i'n solo album a tichhuak zui bawk nen, band angin an kal zawm tawh lo mai ang tih an fan tam tak chuan an hlau hle.

Paramore hian studio album panga an tichhuak tawh a, heng an album-te hi US Billboard chart-ah leh ram hrang hrang chart-ahte an che ṭha ṭhin hle a, Grammy award hialte pawh an lo dawng tawh a ni.