Padikkal-a'n century a siam

Ningani zan Indian Premier League-ah Devdutt Padikkal-a'n century a siam a, Royal Challengers Bangalore-in wicket 10-in Rajasthan Royals an hneh. Zanin dar 7:30 hian Wankhede Stadium-ah Rajasthan Royals leh Kolkata Knight Riders te an inkhel ang.

Wankhede Stadium-a inkhelah Bagalore captain Virat Kohli-a'n vawm hmasak a thlang. Rajathan Royals-in bat hmasain top order batsman te an che ṭha lo a, amaherawhchu Shivam Dube (46), Rahul Tewatia (40) leh Riyan Parag (25) te zarah run 177/9 an siam.

Target awlsam niin lang lo mah se Bangalore tan Devdutt Padikkal leh Virat Kohli te an chet ṭhat avangin over 16.3 lekah run 181 siamin hnehna a chang. Padikkal hian ball 52 lekah thi loin run 101 a siam a, IPL-a century a siam hmasak ber a ni. Kohli pawhin thi loin run 72 a siam ve bawk a, Bangalore opener-te an che ṭha takzet.

Royal Challengers captain Kohli chuan, "Padikkal nen khan kan inbia a, chakna run vaw turin minti. Mahse kei chuan century siam phawt la, tiin ka hrilh. A khelh ṭhat em avangin century siam hi a phu a ni," tiin inkhelh banah a sawi.