India Box Office Vaibelchhe 100 lalut rang ber 'Kesari'

March 21 khan tlangzarh a ni a, a sum lakluh tawh zat chu cheng vaibelchhe 100 a chuang der tawh. Akshay Kumar leh Parineeti Chopra te channa Kesari chu India Box Office-ah a hit zui zel a, kumina film chhuak tawh zinga Rs vbch 100 lalut rang ber a ni.

Kesari hi kar hmasa Ningani khan theater-ah chhuah ṭan a ni a, kar khat a tlin meuh chuan record a siam der tawh. Anurag Singh kutchhuak film hian tunkar Ningani khan vbch 21.06 a lalut leh a, tihian a sum lakluh zawng zawng hi vbch 100.1 a tling ta a ni.

Record a siam
Kuminah Bollywood film chhuak a awm nual tawh a - Uri: The Surgical Strike, Gully Boy leh Total Dhamaal te chu a hit zual an ni. Heng film te hian hun eng emaw chen chu Box Office an thunun a, Kesari a lo lan hnuah a erawh thil a danglam.

Kesari hi kumina film chhuak tawh zingah vbch 100 lalut rang ber a ni a, record siam tur hian ni 10 pawh a mamawh tling lo. Hei hian a hlawhtlin zia chiang takin a tarlang a, hmun hrang hrangah chhuah chhoh mek zel a nih bawk avangin a sum lakluh hi la sang chho leh tura ngaih a ni.

Hei bakah hian Gully Boy leh Total Dhamaal te khumin tlangzarh ni bika sum lalut hnem ber record a lo siam tawh bawk a ni. Tlangzarh ni hian vbch 21.50 zet a lalut nghal a, Ranveer Singh leh Alia Bhatt-te channa Gully Boy chuan vbc 19.40 lalutin pahnihna a ni.

Battle of Saragarhi behchhana siam Kesari-ah hian Akshay Kumar chu Sikh sipai lemah a chang a, a che vel a pui rem rem hle. Kum 30 mi Parineeti Chopra pawh sawi hmaih theih a ni lo a, film hlawhtlin theih nana thawh hlawk ber te zinga mi a ni.