Elvis Presley film-ah Tom Hanks

American actor lar Tom Hanks chu Elvis Presley film-ah a chang dawn a, Presley manager Colonel Tom Parker-a role a play dawn a ni. Tom Parker hi Elvis Presley-a manager a ni satliah ngawt lo a, a nun kaihruaitu ber pakhat a ni.

American singer ropui Elvis Presley biopic hi Australian filmmaker lar Baz Luhrmann chuan a siam dawn a, a changtu tur lam an dap khawm mek. Elvis Presley role play tur tihchian a la ni lo a, chutih rual chuan a manager Tom Parker lamah Tom Hanks a chang dawn tih erawh puanzar a ni tawh.

Elvis Presley film siam tur hian ngaihven a hlawh a, amah ngaisangtu mi tam takin a chanchin hrang hrang tarlanna hi nghakhlel takin an thlir mek a ni. Tih chhuah hun tur lam erawh tarlan a la ni lo thung.

'Jailhouse Rock' singer Elvis Presley hi 1977 khan a boral a, hetih lai hian kum 42 mi chauh a la ni. A sulhnu ropui tak avangin music khawvelah a hming a dai tawh ngai dawn lo a, a manager Tom Parker nena an chanchin ngaihnawm tak tarlanna tur film pawh hian ngaihven a hlawh hle a ni.