G.O.T. changtuten an hlawh hnem

Thla thar mai hian Game of Thrones (GOT) episode thar tichhuah a ni leh tawh dawn a, fans lam pawh an phur tawh hle. Hetih mek lai hian a changtuten episode khat­ah eng zat nge an hlawh a, eng ti ang chiaha hausa nge an ni tih chu mipui hriat chak a ni.

GOT star te hi hausa tak tak vek an ni a, Peter Dinklage, Nikolaj Coster-Waldau leh Emilia Clarke te chu sum ngah zual an ni. GOT aṭanga an sum lakluh ringawt pawh hausakpui lawih tham niin, lar pawh an lar vet vet hle.

Peter Dinklage, Nikolaj Coster-Waldau, Emilia Clarke, Kit Harington leh Lena Headey te chuan episode khat­ah $500,000 ṭheuh an hlawh a, Maisie Williams leh Sophie Turner te chuan $150,000 an hlawh ve bawk.

An zingah hian kum 49 mi Peter Dinklage leh Danish actor Nikolaj Coster-Waldau te an hausa ber a, $mtd 16 ve ve nei anga chhut an ni. Bristish actress Emilia Clarke a duai lo hle a, a hausakna pawh $mtd 13 zet a tling a ni. Kum 32 mi Emilia Clarke hi Kit Harington leh Lena Headey ten an dawt a, an hausakna hi $mtd 12 leh $mtd 9 a ni.

Kum lama la nau deuh Maisie Williams leh Sophie Turner ten episode khat aṭanga an sum lakluh a tlem a, an hausakna pawh midang ai chuan a hniam hret. Kum 21 mi Maisie Williams leh Sophie Turner (23) te hi episode khata an hlawh a inzat a, an hausakna pawh $mtd 6 ve ve a ni. Chutih rual chuan an hmabak a eng hle a, Sophie Turner phei chu GOT changtu zingah hriat hlawh ber tih ngam hial a ni.

Anni ho bakah hian American actor Jason Momoa leh Dutch actress Carice van Houten te pawh an la awm a, a hlawh tam zual zingah erawh an lang pha lo a ni.

Episode khata an hlawh - Net Worth
Peter Dinklage – $500,000 - $mtd 16
Nikolaj Coster-Waldau – $500,000 - $mtd 16
Emilia Clarke – $500,000 - $mtd 13
Kit Harington – $500,000 - $mtd 12
Lena Headey – $500,000 - $mtd 9
Maisie Williams – $150,000 - $mtd 6
Sophie Turner – $150,000 - $mtd 6