Michelle Obama lehkhabu hralh kal

Michelle Obama lehkhabu ziah 'Becoming' chu hralh a kal rem rem hle a, thla nga chhungin copy maktaduai 10 chuang zet an hralh der tawh.

US president hlui Barack Obama nupui Michelle Obama hian a lehkhabu hi nikum November thla khan a release a, Mass media company lar Bertelsmann chuan an tichhuak a ni. A tir aṭang phatin hralh a kal a, thla nga a liam meuh chuan khawvela autobiography chhuak tawh zinga hralh kal ber a ni hial.

Bertelsmann CEO Thomas Rabe chuan, "Beisei phak bakin hralh a kal a, autobiography chhuak tawh zinga hlawhtling ber a nih theih hial kan beisei," tiin, Michelle lehkhabu chungchang a sawi. German company Bertelsmann hian Barack Obama lehkhabu 'The Worst President in History: The Legacy of Barack Obama'-ah khan rights lei nan $mtd 60 zet an lo inseng tawh a, hralh a tla tih hriain an ngam huai he. Michelle lehkhabuah pawh hian share an neih nual a rinawm.

UK-ah pawh 'Becoming' hi a lar vet vet hle hle a, autobiography hralh chhuah tam lamah 11-na a hauh der tawh a ni. Tun anga hralh a kal chho zel a nih chuan a thlen san viau a rinawm. UK-ah hian American author Dave Pelzer autobiography 'A Child Called It' hralh kal ber niin, copy maktaduai 1.1 zet an hralh chhuak a ni.