K. Hminga hla thar 'Kawtthler Khawhar'

Tia K Hminga zai vawng vawng kha i lo ngaithla ve tawh em? Inrinni zanah khan 'Siar Lalnu' hitmaker K Hminga chuan hla thar 'Kawtthler Khawhar' a tichhuak a, a hla dang ho ang bawkin lung a kuaiin a thu a ril lehpek hle a, i lo la ngaithla fuh lo a nih chuan a YouTube channel lamah i duh hun hunah i hmet chhuak thei reng tawh e.

He hla hi ama phuah bawk ni lehin music leh recording pawh ama kut chhuak vek a ni leh a, a hla nena inmil tak video leh Cover Art vel erawh a thawhpui fo ṭhin William Lalrindika kut chhuak a ni thung.

K Hminga hian a hla thar hla thu hi uluk takin a remkhawm leh tih a hriat a, music pawh a mawi lehpekin ngaihthlak a manhla leh viau mai. Lungleng mi i nih phei chuan he hla hi han ngaithla vawng vawng la, i lairil a fan ngei ang tih a rinawm.

Tunah hian K Hminga hian album khat daih vel chu hla a tichhuak tawh a, chung a hla tihchhuah tawh zawng zawng chuan belhchian an dawl hlawm hle a, hla hit tak tak a ni hlawm. Tuna a hla tihchhuah thar pawh hi mi tam tak rilru mil tak leh lung tilengtu a ni leh ngei dawn tih a chiang a ni.

"I dâwtthuin ka beng a luh, ka thluak a buai,
Rilru hliam vangin ka thinlung a au ruai:
A au ri thangkhâwk chuan ka nun hi a nuai,
Râwng takin a nuai a, ka nun a zuai"