‘The Conjuring 3’ a hlauhawm dawn

Horror film ngainatute'n an nghahhlelh, 'The Conjuring: The Devil Made Me Do It' chu Conjuring' Movie franchise zinga hlauhawm ber a ni dawn niin director Michael Chaves chuan a sawi.

Conjuring film thar turah hian paranormal investigators Ed leh Lorraine Warren lema chang Patrick Wilson leh Vera Farmiga-te kan hmu leh dawn a, anni pawh hian Conjuring film series-a hlauhawm ber tur nia an ngaih thu Michael Chaves chuan a sawi mauh mai.

Michael chuan, "Kawng hrang hrangah, he film hi Conjuring movie pui ber a ni. A final cut chu Vera leh a pasal pawh ka entir tawh a, anni pawhin Conjuring movie zingah chuan a hlauhawm ber tih an sawi a ni," a ti.

'The Conjuring: The Devil Made Me Do It' hi a tak taka thil thleng Ed leh Lorrain Warren-te'na an case chhui behchhana siam a ni leh dawn a, mipakhat, a kawchhunga ramhuai luh vanga a in neitu that nia insawi chanchin a ni dawn.

Conjuring film hmasa pahnih lo direct tawhtu James Wan chuan tuna mi hi a direct tawh lo a, Michael Chaves chuan James Wan kut aṭangin he mawhphurhna hi a la a ni. Mahse, Wan hi producer zingah a la tel dawn tho thung.

Kum 2016 aṭang khan he film hi an chang ṭan tawh a, June 4 hian Warner Bros. chuan tlangzarh hman an tum niin, ruahmanna hmasaah chuan nikum September 11-a tlangzarh kha an tum a, mahse Covid-19 vangin an sawn hla a ni. HBO Max lamah pawh en theihin an chhawp chhuak ang.