Oscars : Rin lawk ang ngeiin NOMADLAND a ropui

Khawvelin a ngaih hlut, Academy Award vawi 93-na chu Pathianni zanah (India ram huna nimin zing) khan Union Station leh Dolby Theatre, Los Angeles-ah sem a ni a, rin lawk ang ngeiin Chloé Zhao film Nomadland chu a che ṭha ber a, award pathum a dawng.

Award pahnih dawng film panga lai a awm bawk a, award pakhat dawng film pasarih a awm thung.

Nomadland! Nomadland! Nomadland!
Chloé Zhao film hit tak mai Nomadland hian thawm a neih rinna a lian tawh a, film award semna hrang hrangah award ngaih hlut apiang a hui zel emaw tih tur a ni. Chumi a nih avang chuan Oscar-ah pawh a chet ṭhat ring hi an tam sa hle a, rin lawk ang ngeiin a che ṭha hle bawk. Award pathum ngawt a dawng a ni.

Oscar award sem apianga miin an hriat chak ṭhin chu, 'eng film-in nge Best Picture award dawng?' tih hi a ni. Chu award hlu tak chu kuminah hian Nomadland hian a dawng a, director Chloé Zhao chu Best Director dawngtu a nih bakah a changtunu Frances McDormand chu Best Actress award hum hawtu a ni bawk.

Award dawngtute chu..
The Father, Judas and the Black Messiah, Ma Rainey’s Black Bottom, Mank, Soul, leh Sound of Metal-te chuan award pahnih ṭheuh an dawng.

The Father actor Anthony Hopkins chu Best Actor-ah thlan a ni a, Soul chuan Best Original Score award a dawng thung. Mi tam tak chuan Chadwick Boseman-in best Actor award a dawn an rin laiin Anthony Hopkins hian a dawng ta si a, hei hian sawi zui a hlawh deuh mai thei.

Another Round, Colette, If Anything Happens I Love You, Minari, My Octopus Teacher, Promising Young Woman, Tenet, leh Two Distant Strangers-te chuan award pakhat ṭheuh an dawng bawk.

Christopher Nolan-a film Tenet chu Best Visual Effects dawngtu a ni a, nomination hmu tam ber Mank chuan Best Cinematography leh Best Production Design award a dawng a ni.

Record siamtu Chloé Zhao
Nomadland director Chloé Zhao hian kuminah hian record a siam a, chu chu, vun var ni lo vun rawng dang nei hmeichhe zinga Oscar Best Directoir award dawng thei hmasa ber a ni. Tin, hmeichhe zinga Best Director award dawng thei pahnihna chiah a la ni bawk.

A behbawm
- Oscar 2021 Nomination hi March 15 khan puan a ni.
- Kumin Oscar hi sem an tum hun aia thla hniha tlaiah an sem
- Osacar 2021 hi kum 2006 hnu lama award pathum aia tam dawng an awm lohna hmasa ber a ni.
- Anthony Hopkins (83) chu Best Actor award dawng thei upa ber a ni.