Zaii Hauchhum ‘Nghilh har di hmasa’ official MV kan hmu dawn

Ṭhazual Award 2021 sem a nih khan Ṭhazual award organiser-te chuan zaithiam nula pakhat, Zoram mipuiin kan la hriat ngai lutuk loh an rawn zaitir a, mahse, chunu zai chu Zofate'n ngaihnawm kan ti a, YouTube lamah pawh a zaina chu kan hmet chhuak deuh sek a ni ber. Chunu chu tudang ni loin Zaii Hauchhum a ni.

Chuan, Zaii Hauchhum chuan Ṭhazual Award 2021-a a sak ngei mai, 'Nghilh har di hmasa' chu music video-ah siamin zanin dar 6:45-ah hian Zonet Zawlbuk-ah a tichhuak dawn a, MDM YouTube channel lamah karleh lamah hi chuan hmeh chhuah theihin a awm bawk ang.

A music video-ah hian live-a a sak ang ni loin, music arrangement thar kan ngaithla dawn a, a hla pawh chang hnih ni loin chang thum a ni dawn.

'Nghilh har di hmasa' hi amah Zaii phuah liau liau a ni a, a thluk pawh ama siam a ni. Kima Chhangte chu he a single thar turah hian music producer a ni a, voice record hi chu Bangalore lam Dread and Jaam Studio a record ni thungin, he studio hi Bollywood hla tam tak siam tawhna niin national leh International Award engemaw zât dawng thei a ni.

Music Video Director chu C. Zodingliana (Ctea) a ni a Videography hi Green Rocket kutchhuak niin Video editing hi Master kutchhuak a ni thung. He hla hi digital streaming platform hrang hrangah a chhawp chhuak dawn bawk.

Record siamtu Zaii
Ṭhazual Award 2021-a 'Nghilh har di hmasa' a sakna video YouTube-a a dah khan tunah hian thlirtu maktaduai chuang a nei tawh a, Mizo zaithiam zinga live performance video maktaduai chuangin an thlir hmasak ber a ni a; hei hi Mizo rimawi industry-ah chuan record a ni.

Thla li chhung vel lekin he hla hian record a siam thei a, nimin thlengin thlirtu 1,005,640 lai a nei tawh.