Box Office : Mortal Kombat Vs Demon Slayer

Box Office-ah kar tawp liam ta khan Mortal Kombat leh Japanese anime movie Demon Slayer the Movie: Mugen Train inbei thawm a ring a, sum pawh an lalut tam dun viau. A tawpah erawh theatre tam zawka an chhuah Mortal Kombat chu a chak ta a ni.

Mortal Kombat 'Flawless Victory'
Mizo ṭhalaite'n an nghahhlelh Mortal Kombat 2021 chu US-ah Zirtawpni liam ta khan tlangzarh a ni ta a, theatre-a en theih tura tlangzarh a nih bakah HBO Max lamah pawh an pe chhuak tel bawk. He film hi kar tawp liam taah khan theatre 3,073 laiah chhuah niin $23,302,503 lai sum a lalut a, Box Office topper a ni.

Godzilla vs. Kong ang em emin sum lalut tam lo mah se Mortal Kombat hi a che ṭha hle a, hrileng kara film budget tam tham an tlangzarh zingah chuan a hit ber pawl a ni tho.

Ram dang aṭangin $27,800,000 lai sum a lalut a, hei nen hian khawvel puma Box Office aṭanga a sum lakluh tawh zat chu $51,102,503 lai a ni tawh. Film review-tu ṭhenkhatin an fak viau laiin ṭhenkhat chuan an sawisel bawk a, Mortal Kombat film-a an beisei action hmuhnawm tak tak hmuh tur a awm chu mi tam tak chuan an fak laiin tournament a awm lo erawh mi ṭhenkhat sawiselna a ni thung.

HBO Max lamah pawh en a hlawh hle a, Samba TV-in an tarlan dan chuan US-a chhungkaw maktaduai 3.8 laiin streaming platform kaltlangin an en a ni. Tlangzarh niah ringawt pawh khan chhungkaw maktaduai 1.7-in an en niin an tarlang.

Mortal Kombat hian Warner Bros./Legendary film Godzilla vs. Kong aiin HBO Max lamah hian tlangzarh karah entu a ngah zawk a, Godzilla vs. Kong kha chhungkaw mtd 3.6 velin tlangzarh karah an en anga chhut a ni.

Pahnihna Demon Slayer
Japan leh khawchhak lam Box Office-a che ṭha tak Demon Slayer the Movie: Mugen Train chu kar tawp liam taah khan US-ah tlangzarh a ni a, $21,144,800 a lalut nghal.

He film hi North America theatre 1,600-ah chiah chhuah mah se sum a lalut hnem hle tho a, khawchhak lam chauh ni lo, khawthlang lama chengte pawhin an lo en chak viau tih a hriat.

Demon Slayer the Movie: Mugen Train hi Japan lamah chuan nikum October thlaah khan an tlangzarh daih tawh a, Japan Box office-ah phei chuan record hial pawh lo siam tawhin tunah hian khawvel pumah sum $mtd 456 lai a lalut tawh a ni.

Sum lengvak a tam ṭan
North America Box Office boring tak leh thawm nei ring lo tak chu Godzilla vs. Kong-in a rawn kai tho a, tunah chuan sum lengvak pawh a tam leh ṭan tawh hle. Mortal Kombat leh Demon Slayer sum lakluh zat belhkhawm ringawt pawh hi $mtd 43 chuang a ni a, pathumna Godzilla vs. Kong pawhin $4,290,232 lai sum a la lalut phak a ni.

Theatre pawh an hawng hnem sawtin sum lalut tam ber Mortal Kombat phei chu theatre sangthum chuangah an chhuah thei tawh a, boruak a ṭha chho zel a nih chuan nakkum lamah phei chuan ngai a awh chho leh thei tawh mai thei.

Together Together
Kar tawp Box Office-ah khan pakhatna leh pahnihna bakah hian film thar dang a la awm a, chu chu pariatna Together Together a ni.

Together Together hi comedy film a ni a, Ed Helms leh Patti Harrison-te channa niin theatre 665 aṭangin $522,440 a lalut.