Shai Hills MV thar 'Nghilh a Har'

Mizote'n band kan neih ṭhat ber zinga mi Shai Hills chuan tunhnai khan music video thar 'Nghilh a Har' an tichhuak a, Shai Hills-te rimawi i ngainaa i lo hmet chhuak fuh lo a nih chuan Bruce Pachuau YouTube channel lamah duh hun huna ngaithlak theih turin a awm reng tawh ania.

'Nghilh a Har' music video hi la thar hle mah se a hla erawh a thar lutuk tawh lo. Mi tam tak phei chuan kan ngaithla tawhin kan zawm nghal rut rut thei tawhin a rinawm.

An bassist Bruce Pachuau phuah a ni a, Bruce-a chuan, "Kan record tak chu 2017 khan a ni a, chuan 2018 khan lyrics video cu kan ti chhuak phawt a....," tiin Vanglaini zawhna chhangin a hla an siamna a rei tawh thu a sawi.

"Video pawh tum loh deuhin kan tichhuak thut, tun lockdown chho hi kan hmang ṭangkai a ni deuh ber," tiin a hla an tihchhuahna rei tawh nachunga tunhnaia music video an tihchhuah leh chauh chhan a sawi bawk.

'Nghilh a Har' hla hi a mawiin belhchiah a dawl hle a, zin kawng vela ngaithlak veng veng chi tak niin, lunglen chawk tho thei tak hla a ni. A hla thu bakah a music pawhin belhchian a dawl hle.

Shai Hills hi kum 2015 December-a indin kha niin Goa lama zai tura contract an hmuh avanga indin chawp an ni a, Goa an thlen hnuah band hming pawh an phuah chauh a ni.

Tunah pawh hian hla record sa an nei tih Bruce-a chuan sawiin video shoot chiah an hmabak tawh a, an hla thar dang kan ngaithla leh thei thuai turah beisei ang.