Billie Eilish - 'Happier Than Ever' tlangzarh hun tur a hriat ta

Billie Eilish chuan Thawhlehni khan Instagram-ah a album thar 'Happier Than Ever' chu July 30-ah a tlangzarh dawn tih a sawi.

"KA ALBUM THAR 'Happier Than Ever' JULY 30TH-AH A CHHUAK ANG! ka thil siam tawhah chuan hei hi ka ngainat ber niin in ngaithlak hlan ka nghakhlelin ka zam ru hle bawk. Ka sawi thiam lo zawk. He project ang reng renga project ngainat hi ka la nei ngai lo. Nangni pawhin in ngainat ve ka beisei," tiin Instagram lamah a post.

Eilish chuan vawiinah hian single thar a tichhuak dawn tih a tarlang tel bawk.

American singer lar hian a album thar tur hming tak hi chu a hmain lo tarlang tawh mah se a tlangzarh ni tur erawh Thawhlehni khan a puangzar chiah a ni.

A album thar tlangzarh tur track listing pawh a tichhuak tawh a, a fan-te chuan Spotify, Apple Music, Amazon Music, leh Target lamahte an pre-order thei tawh nghe nghe. He album-ah hian hla 16 a awm dawn a, chung zinga mi 'My future' leh 'Therefore I Am' te chu nikum lamah khan single-in a lo tichhuak tawh bawk.

Billie Eilish hi kum 19 chauh a la ni a, chuti chung chuan Grammy Award pasarih lai a la der tawh. He tleirawl hmabak nei eng tak hian American Music Awards pahnih a lak tawh bakah Guiness World Record pahnih lai a siam tawh. Grammy category pui bera ngaih pali- Best New Artist, Record of the Year, Song of the Year, leh Album of the Year award la thei zinga naupang ber niin heng award hlu tak tak la vek thei pahnihna chiah a la ni.

'Happier Than Ever' hi a studio album pahnihna tur a ni a, kum 2019 khan a album hmasa ber 'When We All Fall Asleep, Where Do We Go?' chu tlangzarhin a hlawhtling rem rem hle a, thla thum chhung lekin US-ah copy maktaduai 1.3 chuang a hralh hman a, Canada-ah phei chuan kum 2019-a album hralh kal ber a ni hial.