Lalthlengliani Jongte hla thar zaninah

Ṭhazual chart topper lo ni fo tawh Lalthlengliani Jongte chuan zanin hian hla thar 'Malsawmna Ka Beisei Leh Si' tih hla a tichhuak dawn.

He hla hi zaithiam Lalruatfela Pachuau phuah niin music leh recording chu Kima Chhangte kut chhuak a ni a, video chu Osiam Pictures kut chhuak a ni dawn thung. Zanin hian Zonet-ah tihchhuah a ni ang a, karleh lam aṭang hi chuan YouTube lamah pawh thlira ngaithlak turin a awm ang.

A hla thar tur chungchang hi Thlengi chuan sawiin,"Nikum October 11 khan ka nu mit(eye) dinglam hi paih ngai in a awm a, Pathian hnenah damna ka beisei tlat a, mahse paih a ngai ta tho a. Ka rilru na lutuk kha Pathian ka dem a, a lakah ka vui a ni. Chumi lai vel chuan he hla hmang hian Pathianin kan nufa hnenah thu a lo sawi a, a chang thumna, 'Harsat mangang tawh chang nite hian, I puih tlak ni tura tihtur hrereng siin; I kawng zawh duh lo a, haider leh si hian e; malsawmna ka beisei leh si a,' tih hian min hneh zual a ni. Midang pawh he helai hla thu bik hian a khawih ve ka beisei," a ti.