Lana Del Rey album thar tur ‘Blue Banisters’

'Summertime Sadness' hitmaker Lana Del Rey chuan social media kaltlangin album thar a tichhuak dawn hnai tih a puang.

Lana Del Rey hian July 4 hian album thar a tichhuak dawn tih sawiin a album hming tur pawh 'Blue Banisters' tih a sawi a, a fan-te ho chu an phur tawh hle. Mahse March thlaa Chemtrails Over the Country Club a tlangzarh hnu lawka a album thar tihchhuah tur a sawi nen erawh a album hming hi a inang ta hauh lo mai!

American singer hian march 19 khan a studio album pasarihna Chemtrails over the Country Club a tlangzarh a, chumi hnu lawkah chuan June 1-ah album thar Rock Candy Sweet a tlangzarh lehnghal dawn tih a sawi. Mahse nimin piah lamah khan social media-ah July 4 hian album thar 'Blue Banisters' a tichhuak dawn tih a puang leh thung si a ni. He thu a tarlan pah hian a album thar album art tur niawm tak pawh a tarlang nghal bawk. Rock Candy Sweet leh Blue Banisters hi a inang nge ni a, Rock Candy Sweet chu a tichhuak leh dawn lo tih chu mi tam tak zawhna a ni rih.

Lana Del Rey hian kum khat pawh tling loah album pathum a tichhuak hman dawn niin a lang. Nikum September thlaah khan Spoken word album Violet Bent Backwards Over the Grass a tlangzarh a, kumin March thlaah khan Chemtrails over the Country Club chu tlangzarh leh bawkin US Independence Day niah tak ‘Blue Banisters’ hi tlangzarh a tum leh bawk a ni.

‘Blue Banisters’ chungchang erawh hi chu hriat tur a la tam lo hle. April 11 khan a teaser a tichhuak zeuh a, April 28 khan tlangzarh hun tur a tarlang leh deuh ringawt a, a bak hriat belh tur a awm meuh lo. Hla engzat nge awm dawn a, englam hawi nge a nih dawn pawh hriat a la ni lo. A studio album pariatna tur hi Interscope Records leh Polydor Records kaltlangin a tlangzarh dawn tih erawh a hriat tawh thung.

Kum 35 lai ni ve tawh Del Rey hian kum 2010 khan a album hmasa ber a tlangzarh a ni.