Standard Model a dik tawk lo em!?

Particle-ho bulpui, Funda-mental Particle-te chêtvel dan tur bulpui (standard model) chungchanga theory awm mek chu tunhnaia Fermi National Accelerator Laboratory-a (Fermilab) an thil hmuhchhuah aṭangin a dik tawk chiah lo em ni? tih theih tur a ni tlat mai!

Chicago khaw daifema awm Fermilab-a Muon g-2 (g minus 2 tia lam tur) an zirchiannaah Standard Model-in a sawi piah bak thil hmuh an nei a, hei hian Physicists te ngaihven a hlawh hle. Standard Model chuan Muon-a magnetic moment chuan 2 a tluk thei lo a, a tluk teuh hle thei a tih laiin, Fermilab aṭanga an hmuhchhuahah g-2 erawh hi chu 2 aiin tlemin a sang hret tih a ni thung. Thil thar a nih rualin a hmain eng emaw beisei lawk erawh a awm tawh. Kum 2001-a Upton, New York-a Brookhaven National Laboratory-a enchhinna an lo neih tawhah chuan eng emaw kim lo awmin an lo hre tawh reng a ni.

Atom hi Electron, Proton leh Neutron ten an siam a ni tih kan hria a, heng zingah hian Electron hi a mal ngâwng a ni tawh a, thil dang belhkhawmin a siam a nih tawh loh avangin Elementary Particle a ni. Neutron leh Proton-te hi Quark-in a siam an ni a, Quark hi chi hrang hrang an awm a, Quark-te hi Elementary Particle-a ngaih an ni. Electron te, tuna Scientist-tena an zirchian Muon te hi Lepton chi khat, Fundamental Particle an tih, ṭhendarh leh theih tawh loa ngaih an ni.

Muon g-2 chungchanga Scientist-te hmuhchhuah thar hian Standard Model te, Quantum theory leh Theory of Relativity-ah te eng angin nge nghawng a neih chhoh ang tih hi mithiamte ngaihven pakhat a ni. Tuna theory kan neih chhungah a leng lo a, theory kan neih sate nen hian a inkalh mah zawka ngaih a ni. Hman deuh khan Electron magnetic moment hrim hrim pawh hi a hmaa an lo sawi ang leh beisei (predict) angin a awm lo tih hriat a lo ni tawh bawk.