Oxygen siamna turin Maruti Suzuki-in an factory khar

India rama car siamtu company lian Maruti Suzuki chuan ramchhunga Covid-19 len avanga oxygen mamawhna a san zel avangin Haryana-a an motor siamna hmun chu oxygen gas siamna a nih theihna turin an khar a, Gujarat-a an motor siamna hmun pawh an khar dawn tih an sawi.

Maruti Suzuki chuan kum khata company maintenance shutdown an neih ṭhin chu an sawn hma a, June-a neih tura an ruahman chu May 1-a neih turin an sawn hma a, hei hi sorkarin oxygen a mamawhna an phurhruk ve theihna tur atana ti an nih thu an tarlang a ni.

Thuchhuah an siamah Maruti Suzuki chuan," Car manufacturing process atan hi chuan Maruti Suzuki chuan an factory-ah oxygen tlem azawng a hmang ṭhin a, a part hrang hrang siam ṭhinte erawh chuan an hmang tam ṭhin hle. Tuna kan dihmun thlir hi chuan, oxygen awm zawng zawng chu nunna chhanna atan hman a ṭul kan ti a ni," tiin an tarlang.