Kristian music : MercyMe album thar ‘Inhale (exhale)’

American Music Award, Billboard Music Award leh Dove Award eng emaw zat lo dawng tawhtu American contemporary Christian band MercyMe chuan Zirtawpni khan album thar ‘Inhale (exhale)’ an tlangzarh.

‘Inhale (exhale)’ hi an studio album 10-na a ni tawh a, Inrinni khan FOX & Friends-ah an album thar chungchang sawi hian an inlan nghal bawk a, an single 'Say I Won’t' an pre-tape chu an pe chhuak nghal bawk a ni.

An album tharah hian track 16 lai a awm a, streaming platform hrang hrangah ngaihthlak tur awm tawhin hla ṭha tak tak a ni hlawm.

MercyMe hi Billboard chuan Top Christian Artist of the 2010s-ah a puang tawh a, kum 2014 khan history siamin an hla 'I Can Only Imagine' chu digital download-ah vawi maktaduai hnih chuang download a ni a, Kristian hla digital domain-a double-platinum kai thei hmasa ber a ni hial! He hla hi tunah chuan 4x platinum a ni tawh.

‘Inhale (exhale)’ hi Tedd T., Brown Bannister leh Mohilowski-te produce a ni a, an lead single 'Almost Home' phei chu Billboard Christian Airplay chart-ah a zawnin kar 17 chhung pakhatna a ni a, 'Say I Won’t' chu tunah hian palina a ni mek bawk.

He album-ah hian midang thawhpui an nei bawk a, 'Brand New' hlaah chuan Gloria Gaynor an thawhpui a, MercyMe frontman Millard ṭhian ṭha tak leh Rascal Flatts lead vocalist ni bawk Gary LeVox pawhin 'A Little Love' a sakpui bawk a, he hla hi LeVox solo album thar turah pawh dah a ni dawn. 'On Our Way' hlaah chuan Millard-a fapa Sam Wesley a tel ve bawk a ni.

A fapa an project-a a tel ve chu Millard chuan chhuanawm a tih thu sawiin,"He band-ah hian ka tel rei tawh a, fa hial ka nei hman, chu ka fapa ngei chu MercyMe record-ah a zai leh bawk a ni. 'I Can Only Imagine’ hla kha Sam damdawi-in aṭanga kan hruai haw karah chart topper a ni a, ka fapa pawm chunga ka mittui luang kha ka la hre reng mai," a ti.