TBBT star Melissa Rauch 'Night Court' reboot-ah a chang dawn

American TV sitcom lar tak The Big Bang Theory chan zawh a nih hnuah khan a changtute ho kha an lar zui bawk a, Tv series, film, podcast, game show leh entertainment show hrang hrangah kan hmu nasa hle a, mahse Bernadette lema chang Melissa Rauch erawhin thawm a nei zui lo hle. Tunah erawh Melissa Rauch chuan thu thar a nei ve ta a, tunhmaa sitcom tihchhuah ṭhin, an siam thar leh tur Night Court-ah a chang dawn.

Night Court hi CBS Sitcom TBBT hnua Melissa Raunch-in role puitling a chan lehna hmasa ber tur a ni dawn. Hemi chungchang hi Deadline chuan tarlangin Night Court siam thar leh a ni dawn tih nikum kum tawpa puanzar a nih khan Melissa Rauch hi executive producer a ni dawn tih tarlan a ni tawh a, mahse show reboot executive producer, Dan Rubin-in a pilot series tur a ziah a chhiar hnuah Melissa hian amah ngei chan va duh ta niin an sawi.

Rauch hi Abby Stone, Harry Stone fanu lemah a chang dawn a ni. He show siam thar leh a nih theihna tur hian Rauch hian hma a la nasa hle a, a original ABC sitcom fan kha ani bawk nen, reboot a nih theihna atan hian a ngaihtuahna pawh a seng nasa hle a ni.

Melissa Rauch channa en tur a awm leh tur hi TBBT lama lo ngaina tawhte tan chuan thu lawmawm tak a ni ngei ang. Thawm ring tak nei zui lo mah se Rauch hian Big Bang lama a chanpui Kaley Cuoco channa The Flight Attendant HBO Max-a tlangzarh a nih khan a fak hle a, tunah erawh amah ngei TV show tharah kan hmu leh dawn ta a ni.